Ka thaiñ shatei lammihngi ka pynmih ïa ki tiar kiba don ki khana ka jinghiar pateng: Dr. Mehtab C. A. Sangma

By Mawphor Editor On Jul 25, 2026

Shillong, Naitung 24: Ka MLA jong ka Gambegre kaba dei ruh ka kurim jong u Myntri Rangbah ka jylla u Conrad K Sangma ka Dr. Mehtab Chandee A Sangma ka la ong ba ki tiar ba la pynmih bad shna na kane ka thaiñ shatei lammihngi ki long kiba kongsan naba ki pyni bad kdew ïa ki jinghiar pateng ba la ai naduh ki longshwa manshwa bad ki long kiba ïaid ïew bha hapoh ka ri India bad kiba pawnam bha ha ki ri ka pyrthei.
Ka Dr. Mehtab Chandee A Sangma ka la kren ïa kine ki kyntien haba kren kum ka kongsan bad hadien ba la plie ruh ïa ka National Buyer Seller Meet cum Exhibition, Indigenous and Heritage Products of North East India ba la pynlong da ka Central Agricultural University, Imphal, College of Community Science, Tura, Meghalaya ha State convention centre Shillong.
Ka Dr. Mehtab ka la ong ruh ban kyntiew shuh shuh ïa ki tiar ba shna bad thaiñ da ki kti jong kane ka thaiñ shatei lammihngi ka long ba donkam ban lumlang ïa baroh bad pynmih tang kawei ka sur na ka bynta ka jingkiew ha ka ïew ka hat ym tang ha India hynrei ha ka pyrthei baroh kawei.
Ka la ong hakum kane ka prokram ka long kaba kongsan naba ka banjur halor ki longkmie kiba sengkam lajong bad kane ka long kaba bha naba ki kmie ki dei ki nongda ïa ka riti dustur ka custom bad ki jinghiar pateng.
Ka la pynkynmaw ba ka Meghalaya ka la thaw ïa ka PRIME program ba la plie da u Myntri Rangbah u Conrad K Sangma ha u snem 2019 ha kaba kane ka la ïarap shibun ïa ki samla kiba kwah sengkam lajong, nangta ki nongri jingri bad kiba kwah ban trei ïa kiwei pat ki jaitkam.
Ka la pynpaw ka jingkyrmen ba kane ka Prokram kaba ar Sngi ba la sdang ha ka Sngi Thohdieng ka ban kut ha ka sngi Saitjaiñ kan ïarap ïa ka jingsam lem ki jingtip para nongseng kam la jong bad kiwei ki jingdonkam.
Ha kane ka sngi ka kongsan ka la leit jngoh ruh ïa ki 75 tylli tam ki dukan ba la die ïa ki tiar bapher bapher na kiba sengkam lajong na ki 8 tylli ki Jylla.
La ïoh ki jingkren na ki nongmihkhmat jong ki skulbah bapher bapher, na u DIG BSF, nangta na ki symbud kongsan ba kynthup na u DIGP (AP) Assam, u Amitav Roy DIG (PSO) Frontier HQ BSF, Shillong, na Dr. KM Bujar Baruah Vice Chancellor barim ka AAU Jorhat, Prof. Dipjyoti Rajkhowa VC AAU Jorhat, na u Satinder Kumar Bhalla, ITS Secretary North Eastern Council, nangta ka jingpynlait ïa ka kot sah kynmaw da ka kongsan bad kiwei kiwei ki prokram.