La pynlong ïa ka prokram SPARK Meghalaya na ka bynta ki Nonghikai ha Mawkyrwat

Mawkyrwat, Naitung 24: Ka SPARK Meghalaya, kaba dei ka prokram jong ka Sorkar Meghalaya hapoh ka Samagra Shiksha Abhiyan (SSA), ka la pynlong ïa ka prokram SPARK Meghalaya Intervention for Teachers ha Nativity Hall, Mawkyrwat, South West Khasi Hills District.
Ka thong jong kane ka prokram ka long ban pynkhlaiñ ïa ka jinglah, ka jingshlur bad ka jingstad pyrkhat jong ki khynnah skul, khnang ba kin roi ha ka jingnang jingstad bad ha ka jinglong briew jong ki ha kaba ha kane ka prokram, ki la don 16 tylli ki skul kiba la wan ban ïashimbynta.
U Bah Renikton L. Tongkhar, MLA ka Mawkyrwat Constituency, u la long kum u Kongsan ha ryngkat ka jingïadonlang ruh ka Kong Daphishisha Kharhoojon, Project Manager ka SPARK Meghalaya, u Bah C. Kassar, Additional Deputy Commissioner ka South West Khasi Hills District, lem bad bun ngut ki nonghikai na ki skul bapher bapher.
Ka jinghikai ha kane ka prokram ka la pynleit jingmut ha lai tylli ki nongrim kiba kongsan. Ka bynta kaba nyngkong ka long ka jinglah ban kren bad pynpaw ïa lade, kaba ai lad ïa ki khynnah ban kren paidbah bad ban pynpaw paidbah ïa la ki jingmut ba ki don ha ka jingim khlem ka jingsheptieng ne ka jingsngewlehraiñ.
Ka bynta kaba ar ka dei ka jingïaineh bad ka bor pyrkhat, kaba hikai ïa ki khynnah kumno ban pynleit jingmut ha ka jingpule, ban ym duh jingkyrmen haba ki ïakynduh jingeh bad ban sngewthuh ïa la ki jingsngew.
Katba ka bynta kaba lai ka long ka jingsngewlem, kaba kyntiew ïa ka mynsiem jingïeid para briew, ka jingïaburom markylliang bad ka jingïarap iwei ïa iwei.
Haba kren ha kane ka jingïalang, ki nongkren ki la ban jur ba ki nonghikai kim dei tang ban hikai ïa ki khynnah ban pule ne ban thoh ha ki kot, hynrei ki dei ruh ban long ki nongai mynsiem, ki nongpynshlur bad ki nonglamlynti kiba kyntiew ïa ka jingïasngewthuh jingmut, ka jingïarap markylliang bad ka jingïalong-kawei, jingïalong-shitylli hapdeng ki khynnah skul, khnang ba kin san ha ka jingstad bad ha ka akor ka burom.