Shillong, Naitung 24: Ka Mawpat SC ka la wanphai na ka shi kol ban khur ïa ka jingjop da 4-2 kol pyrshah ïa ka Pay For Right FA ha ka jingïakhun jong ka Group A ha ka lympung Second Division Football League 2026 ba la pynïaid da ka Shillong Sports Association hynne ka sngi Thohdieng ha madan First Ground-SSA Stadium.
Ha ka jingïakhun dei ka PFR FA kaba la pynkhihjar dang kloi ha ka minit kaba 4 lyngba u Banjiedlang Khongsit hynrei ka Mawpat ka la pynïakhaid noh lyngba u Oliver Pale (16′) bud sa ka kol na u Donboklang Lyngdoh ha ka minit kaba 38 ban lamkhmat ïa ka kylla step.
Haba jam sha ka kylla miet ka Mawpat ka la nang pynskhem ïa ka jingjop da kaba pynkhihjar sa ar sien ba la thep biang da u Oliver (54′) bad u Donboklang Lyngdoh (60′).
Ka PFR FA ka la pynphai kawei lyngba u Banjiedlang ha ka minit kaba 70 hynrei kam shym la biang ïa ka kynhun ba kan kiar na ka namrem.
Ha kane ka sngi yn nym don jingïalehkai ha ka SSA 2nd Division Football league 2026 namar ka SSA kan khreh ban sdang noh ïa ka Shillong Premier League 2026.
ïa kane ka lympung yn plie pyrda da ka jingïalehkai kaba nyngkong hapdeng ka Langsning, kaba bat ïa ka nam lahduh, ka ban aireng pyrshah ïa ka Sawmer SC, ha ka por 4:45 baje janmiet ha madan SSA Stadium.
