Nongpoh, Naitung 23: Ki paidbah ka shnong Umdap Dumu bad Umdap Rngi, ryngkat bad ki Pulit ka Byrnihat Police Outpost lem bad ki nongtrei ka Fire & Emergency Service, mynta ka janmiet ki la ïoh ban sei ïa ka met jong uwei u rangbah briew uba la shah tap ha ka khyndew hadien ba u lum u la twa bad tap ïa ka iing trep ba u shong u sah ban rep ban riang.
Katkum ka jingïoh lum jingtip, la suba ba katei ka jingjia ka la jia naduh ka 20 tarik Naitung, ha ka por ba ka thaiñ Ri-Bhoi baroh kawei ka la mad ïa ka jingther u lapbah kaba la neh bun kynta bad ki jingtwa khyndew bad ki jingshlei um ha bun jaka.
La ïathuh ba utei u rangbah u dei uba sah ha Byrnihat, hynrei u ju leit sah ha katei ka khlaw ha shnong Umdap Rngi ban rep ban riang mynta la bun snem bad hadien ba utei u rangbah um shym la wan phai iing u para u la suba sniew bad leit wad ïa u ha katei ka jaka kaba u sah rep. Hynrei haba poi ha katei ka jaka, u la lap ba ka khyndew ka la twa bad tap syndon ïa ka iing trep ba u sah. Mar mar u la pyntip sha ki bor shnong bad sha ki Pulit ka Byrnihat.
Ki Pulit ka Byrnihat, Fire & Emergency Service bad ki paidbah nong shong shnong ki la hiar mar mar sha katei ka jaka bad pyndonkam da ka puh shilum ban kyndang ïa ka khyndew. Hadien ka jingtrei shitom kaba la neh kumba lai haduh saw kynta, ki la ïoh ban sei ïa ka met jong utei u rangbah ha ka por kumba 4 baje eiei janmiet.
