Shillong, Naitung 23 : Ki sohtrun ba pawnam jong ka jylla Meghalaya mynta ki la poi tiap ban ïoh pynïaid ïew lyngba ka rynsan die kaba kham heh ha ka ri lyngba ka Swiggy Instamart ha Bengaluru, kaba long sa kawei ka sienjam kaba kongsan ha ka jingpynïar ïa ki lad kamai na ka bynta ki nongrep bad ki mar rep ka jylla.
Ïa ki sohtrun la pyni paidbah hapoh ka kyrteng “Pineapple from Meghalaya”, kaba nang pynkhlaiñ ïa ka jingithuh bad ka nam jong kawei na ki mar rep ba pawnam tam jong ka jylla.
Ïa kane ka sienjam la pynïaid lyngba ka Jirang Organic Farmer Producer Company (FPC), kaba dang pynpoi ïa ki sohtrun kiba dang thymmai sha Bengaluru da ka liengsuin ban pynthikna ïa ka jingbha bad ba ki dang thymmai.
Ki jingïasoh sha ki ïew kiba la pynlong lyngba ka FPC ki la pynlah ïa ki nongrep ban ïoh ïa ka dor kaba bha tam na ka jingdie ïa ki sohtrun. Mynta, ïa uwei u sohtrun la die ha Bengaluru ha ka dor kumba 139 tyngka, kaba pyni ïa ka jingmyntoi jong ka jingpynïaid ïew nalor ba ka rah bad pynithuh ïa ka jylla.
Ki heh sorkar ki la ong ba ka jingïoh rung jong ki sohtrun na Meghalaya ha kawei na ki rynsan quick-commerce ba heh tam ha India ka long ka bynta jong ka jingthmu jong ka Sorkar Meghalaya ban thaw ïa ki ïew kamai kiba neh slem bad kiba ai jingïohnong ïa ki nongrep. Kane kan ailad ïa ki nongthied ha Bengaluru ban ïoh suk ïa ki sohtrun ba kyrpang na Meghalaya, katba ki nongrep pat kin ïoh ïa ka ïew kaba skhem bad kaba myntoi.
Ha kine ki snem ba la leit, ka Sorkar Meghalaya ka la nang pynkhlaiñ ïa ki jingpynïasoh ïa ki ïew hapoh bad shabar ri na ka bynta ki mar rep. Ïa ki sohtrun na Meghalaya la dep ban die lyngba ki dukan die mar kiba heh ha Delhi, la shalan ruh sha ki ri Middle East, bad la pynpaw paidbah ha ka Meghalaya Pineapple Festival, kaba la ïarap ban pynithuh ïa Meghalaya kum ka jylla kaba pynmih ïa ki soh ba kyrpang bad kiba bha tam.
Dang shen, ha ka 4th Meghalaya Pineapple Festival kaba long ha Dilli Haat, New Delhi, la lah ban die haduh 30 metric tonne ki sohtrun tang hapoh lai sngi.
Ban nang pynheh shuh shuh ïa ki ïew, ka Sorkar jylla ka la soi ruh ïa ki Memorandum of Understanding (MoU) bad ka Flipkart bad ka NCDEX e Markets Ltd (NeML) ban pynskhem ïa ki jingïasoh ïew digital bad ki ïew paidbah na ka bynta ki mar rep ba kyrpang jong ka jylla.
Ka Sorkar jylla ka la ong ba kan dang bteng ban pynkhlaiñ ïa ki Farmer Producer Organisations (FPOs), ban pynbha ïa ki jingïada bad jingïarap hadien ka jingïoh lum ïa ki mar rep, ban pynjanai ïa ka rukom kit mar bad ban thaw ïa ki lad ïew kiba neh slem, khnang ban pynkiew ïa ka jingïoh jingïarap pisa jong ki nongrep bad ban pynlong ïa Meghalaya kum ka jylla kaba pawnam ha ka jingpynmih ïa ki mar rep ba kyrpang ha India bad shabar ri.
