Shillong, Naitung 23: U Director General of Police ka Jylla u Dr. LR Bishnoi ha ka sngi Saitjaiñ u la leit jngoh ïa ka shnong Madanryting bad Them Basuk ban wanrah ïa ka jingïatreilang na ki nongïalam shnong bad ki bor pulit ban pynurlong ïa ka jingthmu jong u ban ïakhun thma pyrshah ïa ka jingjyllei jong u drok ha kane ka jylla Meghalaya bad uba angnud ruh ban wanrah ïa ka jingïadei kaba jan hapdeng ki paidbah nongshong shnong jong ka jylla bad ka tnat Pulit.
Ha kane ka jingleit jngoh u DGP u la pynlong shuwa ka jingïalang bad hadien pat u la leit jurip ïa ki dong ki kyntoit jong ka Madanrting bad ïa ka shnong Them Basuk da kaba u ïaid kjat ban ïa kren bad ki nongshong shnong jong kine ki shnong
Haba kren sha ki lad pathai khubor, Director General of Police u Dr. L. R Bishnoi u la ong ba ka jingïalang bad ki nongïalam shnong ka Madanryting ka long kaba seisoh. U la ïathuh ba ki nongïalam shnong ki la pynpaw ïa ka mynsiem kaba long la kloi ban ïakhun ïa ka jingpur u drok.
U Dr. Bishnoi u la ïathuh ba ka jingwan jngoh jong u ïa kine ki ar tylli ki shnong kiba don ha khapsor ka long hadien ba u la ïoh jingtip ba kane ka thain ka bun bha ïa ki briew kiba im kyrni ha u drok bad ka long ruh ka shnong kaba jyllei ka jingkhaïi drok
Ha kane ka jingleit jngoh jong u DGP ïa ka shnong Madanryting bad Them Basuk la ïa jingsynranlangruh da u Superintendent of Police u Bah Sylvester Nongtnger bad kiwei kiwei ki heh Pulit.
Kumban shu kdew hangne dang ha kine ki khyndiat sngi ba lah dep, u DGP u la leit jngoh ïa ka Jaïaw bad Mawlai ban ïakynduh ïa ki nongïalam shnong kitei ki thaiñ khnang ban lah ban wanrah ïa ka jingïatreilang na ki khnang ba ka jingïaleh ban tehlakam ïa u drok da ka jingïatrei lang ki shnong ryngkat bad ki pulit.
