Em phim long marwei, ki khun samla ka jylla Meghalaya ki donlang ha syndah bad phi: HYC

Shillong, Naitung 23: Kum shi bynta ban ïa don kti lang bad ai jingkyrshan ïa ki khun samla kiba ïakhih ha nongbah Delhi ha Jantar Mantar, da kaba dawa hiar shuki ïa u Union Minister ba peit tnad pule dangle u Dharmendra Pradhan namar ka jinglait tuh ki jingkylli ba man ka por, ka Hynniewtrep Youth Council kala pynlong ka jingïalang ban kyrshan ïa ki samla ha Delhi.
Ïa kane ka jingïalang la pynlong ha khyndai Lad, ha ka kyrdop barim jong ka Assembly ha kaba kiwei kiwei ki seng bhalang ruh kila wan ban ai ka jingkyrshan bad kumjuh ruh ki samla pule kila wan lang ha kane ka lympung ha ryngkat ka jingdon lang ki rangbah ki longkmie bad ki khynnah barit.
Haba kren ha ka jingialang u Bah Roykupar Synrem u la kren ba “un ym lah ban don ryngkat ha Delhi, hynrei lyngba ka jingwan mynta ka sngi bad ngin ka khubor bap him long marwei namar ba ki nong shong shnong ka jylla Meghalaya, ki khun samla ka jylla Meghalaya kin don ha syndah jong phi”.
“Ka jingwan poi mynta ka sngi ka pyni ba ki khun samla ka jylla Meghalaya ki don lang ha syndah bad ki khun samla ba ïakhih ha Delhi….ka jingwan jong phi ka pyni ïa ka jingsngewkhia ka jongphi ïa ka lawei jong ki khun ki kti bad kumjuh ruh na ka bynta ka lawei jong ki hymmen ki para ki jong phi” ong u Bah Roy.
Shuh shuh u la ong, “Ka jingdon ka jing phi mynta ka sngi ka phah ïa ka khubor kaba shai kdar sha ki briew kiba don ha ka bor bakim dei ban lehkai bad ki khun samla jong ka ri namar ka jingmong bad ka jinglynga ki samla ba ïakhih ha Delhi ka ktah lang kumjuh ïa ki samla hapoh Meghalaya”.
U wei u riew rangbha uba la wan ban ai jingkyrshan ïa kane ka jingialang ka HYC u la ïalam lang bad ar ngut ki khun kynthei da kaba ong ba ki khun jong u kila pyndep ïa ka eksamin na ka MBOSE hynrei u la buh jingkylli ïa u Myntri Rangbah duh ka ri u Narendra Modi ba naei u la pyndep ïa ka jingpule bad balei u ïalehkai bad ka lawei ki khun samla jong ka ri.
Une u rangbah u la pynrem jur ïa ka party BJP bad kumjuh ruh ïa u Narendra Modi, Amit Shah ba kidei ki mentuh kiba nud ban lehkai ïa ka lawei jong ki khun samla jong ka ri.
Ha kane ka sngi na ka liang ki samla pule kila ai khublei kyrpang ïa ka HYC kaba la pynlong ïa kane ka jingïalang namar ba ki ioh ka lad ban pynpaw ka jingkyrshan ïa ki khun samla kiba ïakhih ha nongbah Delhi.