Shillong, Naitung, 23: Ha ka sien kaba ar, u Bah Pynshailang Lyngdoh Nongdiang uba dei u Youtuber ïa uba ki paidbah ki ju tip kum u Bah PS Lyngdoh u la shah khot hajir ha ki Pulit jong ka Sadar Police Station ha ka sngi Saitjaiñ halor ka jingpynmih ïa ka khubor ha ka Youtube Channel ka jong u kaba u la ai kyrteng PS Lyngdoh da kaba kynthoh ïa ka jingtreikam jong ka tnat Pulit bad halor ka jingpynslem jong ka Sorkar jylla ban pyllait paidbah ïa ka kaiphod tohkit halor ka jingshah siatïap jong u nongïalam barim ka seng kieng atiar Hynniewtrep National Liberation Council (HNLC) u Bah Cheristerfield Thangkhiew ïa kaba ladep aiti da u Nongbishar ba la shongthait u Justice T. Vaiphei sha ka Sorkar Jylla.
Ha kane ka jingleit hajir hakhmat ki Pulit jong ka Sadar Police Station, ïa u Bah PS Lyngdoh la synran lang da ki nongïalam bad ki dkhot jong ka Khasi Students Union (KSU) South West Khasi Hills District lem bad ki katto katne ngut ki longkmie.
U President jong ka KSU SWKH u Bah Forwardman Nongrem ha ka jingïakren bad ki lad pathai khubor hadien ba la mih na Thanat u la ong, “ngi la ïoh jingtip ba ki Pulit ki la rejister case pyrshah ïa u Bah PS Lyngdoh bad kum ka seng ngi pynrem jur ïa kane ka jingleh jong ki Pulit. Ka tnat Pulit lada ka shah kynthoh na ka liang jong ki paidbah ka ladei ban pynbeit ïa kata ka jingbakla hynrei kumba ka long mynta lada don kiba kynthoh ha kaba ïadei bad ka jingtreikam jong ka tnat Pulit ki pyrshang pynban ban pynsngap jar bad thep ha ki kyndon aiñ bapher bapher.”
“Kane ka dei ka jingpyrshang jong ki bor Pulit ban pyntieng pynsmiej ïa ki riewpaidbah ha ka jaka ba kin pynbeit ïa kata ka jingbakla kaba don hapoh ka tnat,” ong une u nongïalam ka KSU.
“U Bah PS Lyngdoh u la kren lyngba ka Youtube Channel ha kaba ïadei bad ka jingtlot bad ka jingleh shiliang jong ka tnat Pulit bad ngi lah ban ong ba ka jingkren jong une u samla (PS Lyngdoh) ka dei ka sur jong kiba bun balang ba ki kynthoh ïa ka jingleh shilliang bad ïa ka jingleh donbor jong ka tnat Pulit,” la kynnoh une u nongïalam ka KSU.
Haba pynrem jur ïa ka jingkhot hajir jong ki Pulit ka Sadar Police Station ïa u Bah PS Lyngdoh, u Bah Nongrem u la ong, “ban thep case bad ban thep ha ki kyndon jong ka aiñ ïa ki riewpaidbah kiba kynthoh, kiba kren bad kiba ïohi ïa kata ka jingbakla ngi pynrem jur.”
U la ong ba ka KSU kan ïai don ryngkat bad ki riewpaidbah bad ka seng hi kan ym ailad ban shah pyntieng pynsmiej ha ki briew jong ka aiñ.
Dang ha ka taiew ba nyngkong mynta u bnai u Bah PS Lyngdoh u la shah khot hajir ha ki Pulit jong ka Sadar Police Station halor ka jingpynmih ïa ki khubor lyngba ka Channel jong u kiba ktah ïa ka jingmut jingpyrkhat jong ki briew kiba peit ïa ka video.
Ki Pulit ki la bthah ïa u Bah PS Lyngdoh ba u dei ban kiar na kaba pyndonkam ban thep ïa ki dur bad kiwei kiwei ki jingai jingtip khlem da pynshisha shwa na ki bor badei peit.
