Lamkhmat ka Kong Santa ban shim ïa ka test HIV haba plie ïa ka Integrated Health Campaign (IHC) ha EJHD

Khliehriat, Naitung 21: Ka ophis jong ka Meghalaya AIDS Control Society, Shillong ha ryngkat ka jingïatreilang bad ka ka ophis u Deputy Commissioner, East Jaiñtia Hills District lem bad ka ophis jong u District Medical & Health Officer (DM&HO), East Jaiñtia Hills District mynta ka sngi ka la pynlong ïa ka prokram kaba kyrpang ha kaba ka MLA jong ka Sutnga Saipung, ka Kong Santa Mary Shylla kum ka kongsan ka la plie paidbah ïa ka Integrated Health Campaign (IHC) kaba yn pynlong haduh lai bnai kynthih hapoh ka district, la pynlong bad sdang ïa kane ka camp ha Community Hall Dkhiah East.
Haba kren ha ka jingïalang ka MLA, kong Santa Mary Shylla ka la ong ba kane ka Integrated Health Campaign (IHC) ka dei kawei na ki camp kaba donkam bha na ka bynta ki paidbah nongshong shnong ka ban ai ka jingshakri kaba radbah ha kaba ki briew ki lah ban leh ïa ki screening bad leh ïa ki HIV test khlem da donkam ban siew pisa bad kum ka dak ka jingsdang bad ruh ban pynshlur ïa ki paidbah ban wan phah test ha kane ka Integrated Health Campaign (IHC) ka Kong Santa ka la mih shakhmat bad lam khmat da kaba ka la leh ïa HIV test, ka la kyntu ïa baroh ki nongshong shnong jong ka district ba kim dei ban don kano kano ka jingsngew pher haba phah test bad leh ïa ka screening namar kane kan iarap ban kyntiew ïa ka koit ka khiah bad ruh ban tehlakam ïa ka jingsaphriang u khñiang jingpang HIV.shuh shuh ka kongsan ka la ban jur ïa ka jingdonkam ban don ka Antiretroviral Therapy (ART) Centre hapoh ka district ba kan pynsuk ïa ki briew ban leh ïa ki test.
Ka kongsan ka la ong ruh ba katkum ka jingtip ba la ïoh ba une u khñiang HIV u pyntlot ïa ka bor met lane ka immune system, u pynlong ïa u/ka briew ban ioh bun jait ki jingshitom bad ong ba ka jingsaphriang u khñiang HIV ka dei ruh na ka daw ka jingleh sting ban phah test bad ban shim ïa ki lad jingsumar, ka dei ruh na ka daw ba ki briew ki don ha ka jingmut jingpyrkhat ïa kata ka jingsngew lehriañ, sngew kumba kiwei ki peit beiñ hynrei ym dei ban buh kano kano ka jingsngew hynrei dei ban wan shakhmat ban leh ïa ka test
Ka la ong, “Ban tehlakam ïa ka jingsaphriang ka HIV donkam ruh ka jingïatreilang jong baroh, kynthup naduh ki tnat sorkar bapher bapher, ki paidbah nongshong shnong ban don ka jingkitkhlieh ban pynshai sha ki paidbah ba ym ju dei ban don ka jingsngew lehriañ haba phah test HIV bad na ka liang ka tnat ka koit ka khiah ruh kam ju pynbna paidbah ïa kino kino kiba don HIV bad ka tnat ka shim beit ïa ki lad ban ai ki jingsumar.”
Ka Assistant Commissioner, East Jaiñtia Hills District, ka kong F. Wann, ka ai ka jingkhublei ïa ka Meghalaya AIDS Control Society kaba la pynlong ïa kane ka prokram Integrated Health Campaign ha East Jaiñtia Hills District ha kaba kane ka camp prokram ka dei kaba donkam bad ka ban ai jingmyntoi ïa ki paidbah, la ong ruh ba ka East Jaiñtia Hills ka dei kawei na ki district kaba kiew ha ka jingdon u khñiang HIV kaba la tip ruh kum ka red-flag districts, bun ki briew ki dang kyntait ban tip shaphang ka jingpang HIV lane ka HIV Status namar ki don ka jingsngew lehriañ ha ki ban leh ïa ki test, kumta ka kyntu ïa baroh ki paidbah ba kim dei ban don kano kano ka jingsngew ha ki hynrei ki dei ban mih shakhmat ban phah test HIV ban wan sha kine ki Integrated Health Campaign ha kaba ym donkam ban siew pisa, ka kyntu ba ki dei ban phah test bad lada jinglap ba don kiba pang HIV ka tnat ka koit ka khiah kan ai ki jingsumar bad ruh yn lah ban tehlakam ïa ka jingsaphriang u khñiang HIV.
Ka kong Wann, ka la ong ruh ba ka jingeh jong ki tnat ba dei peit ïa kiba pang HIV ka dei na ka daw ba ki briew kim don ka mon ban phah test HIV.
Kiba la ai jingkren ki kynthup ruh ka ka Project Director, Meghalaya AIDS Control Society, Shillong Dr. K.L. Ïawbor bad kiwei kiwei.
Kiba la ïa don ryngkat ha kane ka prokram ki kynthup ruh ka District Social Welfare Officer (DSWO), East Jaiñtia Hills District, kong R Bareh, Secretary District Legal Services Authority (DLSA), East Jaiñtia Hills District, kong B. Kharbithai, u Block Development Officer (BDO) Saipung Block, Dr R. Pyrtuh, u Block Development Officer (BDO) Lumshnong, C&RD Block, bah M. Kyndait, ki heh sorkar na ka tnat ka koit ka khiah, ki paidbah nongshong shnong bad kiwei kiwei ki riew rangbah.
Ha kane ka sngi ka kynhun ka la sdang ïa kane ka Integrated Health Campaign (IHC) na Community Halll Dkhiah East bad ha kiwei kiwei ki jaka ruh bad don ruh ki kynhun kiba leit ban rung sha ki thliew ïing jong ki nongshong shnong.
Kum ban shu bynrap, kane ka Integrated Health Campaign (IHC) ka don ka jingthmu ban pynjan ïa ki lad jingsumar sha ki paidbah nongshong shnong khamtam kito kiba shong ba sah sha ki jaka nongkyndong, ha kane ka camp ki paidbah ki ïoh ruh ïa ka lad ban leh ïa ki X-Ray, ban leh ïa ki test bapher bapher kum kaba test jingpang shini lane ka diabetes, test jingpang TB, test ïa ki khmat bad kin ïoh ki dawai bad ki jingsumar khlem da donkam ban lut pisa, ha ki Integrated Camp yn leh ïa kaba pynrung kyrteng ha u Aadhaar, MHIS Smart Card enrolment khnang ba ki paidbah kin ïoh ïa ki jingmyntoi kiba na ki tnat sorkar.