Da ka bike rally bad street play, ïalap paidbah halor ka SIR ha Ri-Bhoi, jan poi 100% ka SIR

Nongpoh, Naitung 22: Ban pynsngewthuh paidbah halor ka jingdonkam ban shim bynta lang baroh haka Special Intensive Revision (SIR) naka bynta ban pynrung kyrteng haka thup jong ka electoral roll, ka tnad election jong ka ophis u Deputy Commissioner ka Ri-Bhoi District mynta ka sngi kala pynlong ïaka bike rally bad kumjuh ruh ka street play bala shim bynta da ki samla bad kumjuh ruh ka Electoral Literacy Club jong ka Ri-Bhoi College, Nongpoh.
Ka thong jong ka SIR ka long ban kynthup lut baroh ki nongshong shnong kiba la dap 18 snem ka rta ba kin pynrung kyrteng ïalade haka thup jong ka electoral roll ban ioh ïaka hok thep vote bad ba uwei pa uwei u nongshong shnong um dei ban shah ieh hynrei ban rung ha katei ka thup.
Ïa katei ka jingïalang ban sdang ïaka rally ki thuk thuk bad kumjuh ruh ka street play la pynlong ha phylaw ka Nongpoh Town Shopping Complex ha kaba la wan ruh ban run ryngkat da u Bah GLC Mylliem Assistant Commissioner ka Ri-Bhoi District, ka kong L Iawphniaw ka nonghikai jong ka Ri-Bhoi College, ki samla pule lem bad ki nongñiah thuk thuk.
Naka liang kitei ki nongñiah thuk thuk kila mih na Nongpoh Town Shopping Complex, ban sdang naduh Byrnihat bad ïaid ter ter lyngba ka Nongpoh, Umsning bad shaduh Umiam bad kin sa phai biang sha Nongpoh.
Kumba long haduh mynta ka SIR kla ïaid shakhmat ha Ri-Bhoi District ha kaba ka jingsam ïaki enumerations form kala poi haduh 2,05,468 kaba la kot haduh 99.87% bad kumba 1,40,234 lah dep ban digitised kaba la kot kumba 68.16% bad naka liang ka tnad elekshon kala khmih lynti ba shen yn sa poi 100% shuwa ban kut ka tarik da ka jingshim bynta shitrhem jong ki paidbah bad uwei ruh u nongshong shnong um dei ban shah iehnoh ha ka thup kyrteng electoral roll.