Nongstoiñ, Naitung 21: Ki paitbah nongrep ha kine ki sngi ki shem jingeh haduh katta katta na ka daw jong ka jinghiar dor palat jong ki mar rep. Ka la buh jingeh haduh katta katta ïa ki kmie ki kpa bad ki longïing longsem ban kyrshan skul ïa ki khun, namar ba ki hap ban pynlut bun bah ka pisa na ka bynta ban thied kot thied sla, ka bai skul, bai iuniphom bad kiwei kiwei.
U bah Dipstarly Rngaid uwei na ki nongrep na ki thaiñ Mawdoh, u la ong ba ha kine ki snem naduh ba ka sorkar ka la ithuh ïa u synsar, palat marshiteng na ki nongrep ha ki thaiñ rimen ki la pynleit jingmut ha kaba rep synsar. Hynrei ha une u snem ka jinghiar dor u synsar ka la long shaba palat haba ïa nujor bad u snem ba la dep.
U la ong ruh ba ha u snem ba la dep u ïa u synsar na ki thaiñ rimen la lah ban die ha ka dor shispah laiphew tyngka shi kilo, hynrei mynta u snem pat ki nongthied ki pan tang ha ka dor hynriew phew tyngka shi kilo ha kaba ka jingïapher ka long palat ïa ka mar shiteng.
U la ong ruh ba lada rep bun ym lah ban kheit lut tang dalade, namar ka por kheit synsar ka long tang ar haduh lai taïew. Palat ïa kata u synsar u la sdang sa ban phuh syntiew bad shisien ba la phuh syntiew ym don shuh ba treh ban thied, kumta hap ban ïabeh ïa ka por ban kheit.
Nangta u la ong ruh ba katkum ka jingïaid jong ka por, ki nongbylla ruh ki pan da ka dor kaba heh bha, kata san spah haduh hynriew spah shi sngi, namar lada ai wai ban phah kheit ki la ban ba kin ïoh ha ka dor sanspah haduh hynriew spah ha ka shi sngi.
U bah Rngaid u la ong ruh ba katkum ka jingtip jong u, ki mahajon kiba wan thied synsar ki la leit shim pisa lypa na ki dkhar Marwari bad ki sa wan ban thied bad ki dep kheiñ lypa ba ki dei ban ïoh nong marshiteng na ka dor thied.
U la ong ba kumba ka long baroh shikatta ki mar rep ki bym ju neh ka dor ïew ki dei u synsar, u sying bad u biskot. Namar ba la ju lap ba u synsar ha ka por ba dang sdang mih nyngkong ka dor ka heh, hynrei tang hadien ar sngi lai sngi ka dor ka hiar kynsan bad don ruh teng teng ba ha ka por myntep ka dor ka kiew.
Hynrei ynda poi ka por janmiet ka dor ka hiar kynsan jlang kat haduh ba ka la long kum ba shu ai ei ha kito ki nongthied bad ha kine ki sngi lei lei ki nongrep biskot, ki la hap ban shu iehnoh kumto na ka bynta ban ai bam sniang namar ka dor ka la hiar sha ka lai tyngka shi kilo.
Kumta halor katei ka jinghiar dor jong ki mar rep u bah Rngaid u la kyntu jur ïa ka sorkar ba ka dei ban leh ei ei lymda kumta ki paitbah nongrep kin shu mad jingeh shilynter jingim.
Ha kajuh ka por u la kyntu ïa ki sengbhalang bapher bapher hapoh ka jylla bad ïa ki nongmihkhmat na ki seng saiñ pyrthei bapher bapher ba kin shimkhia lem, ban dawa na ka sorkar ba ka dei ban phaikhmat sha ki nongrep bad ba kan bthah ïa ki nongthied, ba ki dei ban kyntiew bad pynneh ïa ka dor ka mur jong ki mar rep, khnang ba ki paitbah kin ïa imlang bad ba ka ïoh ka kot jong ki longïing longsem jong ki nongrep kan kiew.
