Shillong, Naitung 21: Ka Inter-Media Publicity Coordination Committee (IMPCC), Shillong mynta ka sngi ka la rai ban pynkhlaiñ ïa ka jingai jingtip na ka Sorkar lyngba ka jingïatreilang bad ban pynjur shuh shuh ïa ka jingai jinghikai bad jingïashim bynta lang jong ki paidbah hapoh ka campaign ‘Swachhata Hi Seva’ ha ka jingïalang jong ka ba man la u bnai ba la pynlong da ka North Eastern Institute of Ayurveda & Homoeopathy (NEIAH), Shillong.
Ki nongmihkhmat jong ki tnad Sorkar Pdeng bad Sorkar Jylla, ki media unit jong ka Tnad Information & Broadcasting bad kiwei kiwei ki jaka treikam paidbah ki la ïakren halor ki rukom treikam ban kyntiew ïa ka jingai jingtip paidbah lyngba ka jingïasoh ba kham bha, ka jingïatreilang bad ki lad pathai khubor kaba seisoh bad ka jingpynsaphriang kham ïar ïa ki polisi jong ka Sorkar bad ki sienjam kiba pynshong nongrim ha ki nongshong shnong.
Haba pdiang sngewbha ïa ki nongïashim bynta, u Prof. (Dr.) Vijay Kumar, Director, NEIAH, u la ban jur ia ka jingnoh synniang jong ka institute ban kyntiew ïa ka Ayurveda bad ka Homeopathy lyngba ka pule puthi, ka koit ka khiah, ka jingwad bniah bad ka jingai jingtip ia ki paidbah. U la ong ba ki rynsan ba ïatreilang kum ka IMPCC ki pynkhlaiñ ïa ka jingïatreilang hapdeng ki kynhun jong ka Sorkar bad pynsuk ïa ka jingpynsaphriang jingtip kaba kham ïar ïa ki prokram kiba ai jingmyntoi beit beit ïa ki nongshong shnong.
U la pynshai ruh ïa ki nongïashim bynta shaphang ki kam pule puthi, ki kam sumar bad ki kam wad bniah jong ka NEIAH dang shen bad u la pynskhem biang ïa ka jingkut jingmut jong ka institute ban ïatreilang ban ai jingtip ïa ki paidbah.
Kum u Convener jong ka IMPCC, u Gopajit Das, Assistant Director, Press Information Bureau (PIB), Shillong u la ban jur ba ka jingai jingtip kaba paka ka long ka bynta kaba kongsan eh na ka bynta ka jingsynshar kaba bha bad ka jingpyntreikam kaba jop ïa ki prokram jong ka Sorkar. U la kyntu ïa ki tnad ba kin pyndonkam ïa ki rynsan ai jingtip lyngba ki jingthoh, electronic, radio, digital bad social media bad ban pyndonkam ïa ki lad ai jingtip jong ka PIB, Central Bureau of Communication (CBC), Doordarshan bad Akashvani na ka bynta ka jingpynsaphriang jingtip kaba kham ïar ïa ki sienjam jong ka Sorkar. U la ban jur ruh ïa ki sienjam ïatreilang bad ki lad pathai khubor ba dang shen jong ka PIB Shillong katba u la pynshlur ïa ki tnad ban ïasam man ka por ïa ki khana jingjop bad ki rukom treikam kiba bha tam.
Ha kane ka jingïalang, ki tnad bad ki kynhun kiba ïashim bynta ki la ai ïa ki jingtip ba thymmai shaphang ki sienjam pynsaphriang khubor ba kongsan jong ki bad ki prokram ki ban sa wan. U B. Basumatary na ka Ophis jong u Director of Census Operations, Meghalaya, u la ïasam ïa ki jingpynkhreh na ka bynta ki campaign jingpynsngewthuh paidbah kiba ïadei bad ka Census, katba u Vikas Dahiya na ka Reserve Bank of India, Shillong, u la ban jur ïa ka jingai jinghikai shaphang ka kam pisa tyngka, ki lad ai jingsiew lyngba ki lad digital bad ki sienjam ban kynthup lang ïa baroh ha ka kam pisa tyngka.
Ka kong C. Marbaniang na ka Program wing jong ka Akashvani Shillong bad u Laishram Chingranglakpa na ka Akashvani North Eastern Service ki la batai ia ki sienjam ai jingtip paidbah jong ki kiba kynthup ia ki skhim jong ka Sorkar, ka koit ka khiah, ka rep ka riang, ka jingkyntiew ïa ki samla bad ka jingai jinghikai shaphang ka mariang.
Ka Dr. Juliana Lyngwa na ka Regional Health & Family Welfare Office, ka tnat ka Koit ka Khiah, ka la pynshai ïa ki dkhot halor ki kam Anti-Dengue Month bad ki prokram ba ïadei bad ka koit ka khiah jong ka ri, katba u Thangjalal Lhouvum na ka India Meteorological Department (IMD), Shillong, u la ban jur ia ka jingpynsaphriang khubor bad ka jingai jingtip shaphang ka jinglong ka suiñbneng ban pynkhreh na ka bynta ki jingjialynshop ki bor ka mariang.
U la pyntip ruh sha ka Komiti shaphang ki sienjam ba dang shen jong ka IMD ban pynkhlaiñ ïa ka jingbatai lypa shaphang ka jinglong ka suiñbneng bad ki kam ai jingtip kham kloi ha kylleng ka thaiñ shateilammihngi lyngba ki rynsan peit bniah kiba kham bha, ban kyntiew ïa ki lad ban ïathuh lypa bad ka jingpynsaphriang khubor ha ka por kaba biang ïa ki jingpynbna shaphang ka jinglong ka suiñbneng kaba pynshong nongrim ha ka jingktah.
U Dr. B P Singh jong ka ICAR-Agricultural Technology Application Research Institute (ATARI) u la ban jur ïa ka jingpynsaphriang ïa ka teknoloji, ka jingpynkhlaiñ ïa ka bor treikam jong ki nongrep bad kiwei kiwei ki sienjam kiba dang ïaid ha kylleng ka thaiñ shatei lammihngi. U la ïasam ïa ki jingtip ba thymmai halor ki kam ba dang shen jong ka institute, kynthup ïa ka jingrakhe ïa ka National Fish Farmers’ Day, ha kaba la pynlong ïa ki prokram pynsngewthuh bad ki jingpyni ha ki jaka treikam halor ka jingpynmih ïa ki symbai dohkha ba bha na ka bynta jan 100 ngut ki nongrep na ki shnong ba la shimti ha Ri-Bhoi district.
Ki la ban jur ruh ïa ka jingrakhe ïa ka ICAR Foundation Day kaba 98 bad ka jingrakhe ïa ka lyngkhuh sngi ïap jong U Tirot Sing Syiem hapoh ka phang ‘Ki Samla bad ka jingkyntiew ïa ki sap’.
U Krishna Kumar na ka NECTAR u la pyntip ïa ka Komiti shaphang ka jingwan jngoh dang shen jong u Myntri Khynnah ka Sorkar Pdeng ba dei khmih ïa ka Science & Technology, u Dr. Jitendra Singh, ha kaba u la plie paidbah ïa ka GeoInformatics Laboratory jong kane ka jaka treikam kaba la pynbiang da ki drone kiba katkum ka juk mynta, ka LiDAR bad ki teknoloji geospatial ban pynkhlaiñ ïa ki jingpyndonkam geospatial bad jingwad bniah ha ka thaiñ.
Ka kong M. Blah na ka NIFT Shillong, u C. D. Sangma na ka tnad Information & Public Relations (DIPR), Sorkar Meghalaya, bad ki nongmihkhmat jong ka Central Bureau of Communication (CBC), Shillong ruh ki la ïasam ïa ki jingtip ba thymmai ha kaba ïadei bad ki sienjam ai jingtip, bad jingpynsngewthuh paidbah jong ki.
Ha ki jingïamir jingmut, ki dkhot ki la ban jur ïa ka jingdonkam ban don ka jingïatreilang kaba kham bha hapdeng ki tnad Sorkar ha kaba pynsaphriang ïa ki jingtip shaphang ki prokram ba kongsan bad ki sienjam kiba pynshong nongrim ha ki nongshong shnong. Ki la ban jur ïa ka jingsam jingtip ha ka por kaba biang, ka jingïatreilang bad ki lad pathai khubor bad ka jingpyndonkam pura ïa ki rynsan ai jingtip barim bad ki lad digital ban pynpoi ïa ki jingtip sha ki paidbah.
Ka jingmih kaba kongsan jong ka jingïalang ka long ka rai ba ïa mynjur lang jong ki dkhot ban pynkhlaiñ shuh shuh ïa ka jingai jinghikai bad ka jingïashim bynta lang jong ki paidbah hapoh ka campaign ‘Swachhata Hi Seva’ ha la ki jong ki jong ki ophis bad ki kynhun lyngba ki jingpynkhuid, ki prokram pynsngewthuh, ki kam ïashim bynta jong ki nongtrei bad ka jingïatreilang ban ai jingtip ïa ki paidbah. Ki dkhot ki la mynjur ruh ban ïasam ïa ki jingmih bad ki rukom treikam kiba bha tam na kine ki sienjam ha ka jingïalang ban wan jong ka IMPCC.
Hadien ka jingïalang, ka NEIAH ka la pynlong ïa ka jingpyni bad jingpyrshang ïa ka protocol ‘Yoga Break at workplace’, ha kaba ki nongïashim bynta ki la leh ïa ka yoga kiba suk kaba thmu ban kyntiew ïa ka koit ka khiah ha ka met bad ka bor pyrkhat ha ka jaka trei. Hadien kata la ïalam ïa ki delegate ban leit jngoh ïa ka hospital ai jinghikai jong ka institute, ki jaka pule, ki jaka wad bniah bad kiwei kiwei ki jaka ba kongsan.
Ka Inter-Media Publicity Coordination Committee (IMPCC) kadei ka jingïalang ba man la u bnai jong ka Tnad Information & Broadcasting kaba pynïasoh lang ïa ki tnad sorkar pdeng bad sorkar jylla, ki Public Sector Undertaking, ki kynhun ba laitluid bad ki media unit jong ka Tnad ban pynkhlaiñ ïa ki jingïatreikam lang hapdeng ki tnad, bad pynsuk ïa ka jingpynsaphriang jingtip shaphang ki polisi jong ka sorkar, ki prokram bad ki sienjam ba ïadei bad ka bha ka miat jong ki paidbah. Ka rynsan ka kyntiew ïa ka jingsam ïa ki rukom treikam kiba bha tam, ki jingïatreilang ban ai jingtip bad ka jingpynsaphriang jingtip lang ban kyntiew ïa ka jingsngewthuh paidbah bad ka jingïashim bynta jong ki nongshong shnong.
