Ha Shillong yn pynlong ïa ka ‘National Buyer-Seller Meet’ ban pyni nam ïa ki mar tynrai jong ka North East

Shillong, Naitung 21: Palat 100 ngut ki nongtrei da ka kti, ki nongseng kam seng jam, ki nongthied bad ki nongbei tyngka na kylleng ka thaiñ shatei lammihngi la khmih lynti ba kin ïawan lang ha Shillong mynta ka taiew na ka bynta ka national buyer-seller meet kaba thmu ban pynïasoh ïa ki mar tynrai jong ka thaiñ bad ki iew kiba kham heh hapoh ka ri bad ki iew shabar ri.
Ka Central Agricultural University (CAU), Imphal, lyngba ka College of Community Science, Tura, kan pynlong ïa ka National Buyer-Seller Meet-cum-Exhibition halor ki mar tynrai jong ka thaiñ shatei lammihngi jong ka Ri India ha ka State Convention Centre ha ka 24 bad 25 tarik u Naitung.
La pynlong ïa kane halor ka phang “From Heritage to Enterprise: Empowering Women Artisans in Northeast India,” kane ka lympung ka long ban pynkhlain ïa ka jingïoh lad ban ïoh ïa ki iew na ka bynta ki kam ba la ïalam da ki kynthei, ki kynhun self-help groups (SHGs), ki farmer producer organisations (FPOs), ki nongsdang bad ki nongtrei da ka kti bad ki nongdie khutia, ki exporters, ki nongbei tyngka bad ki e-commerce platforms.
Ha kane ka jingpyni nam, yn pyni ïa ki jait mar tynrai bad Geographical Indication (GI) kiba don ha baroh ki 8 tylli ki jylla ka thaiñ shatei lammihngi, kynthup ïa u shynrai Lakadong na Meghalaya, Adi Apong (rice wine) na Arunachal Pradesh, u sohmynken Dalle ba na Sikkim bad u Chak Hao (black text rice) na Manipur, ki mar ba thain da ka kti, u lungsiej, ki mar ba shna na u siej ki dawai kynbat bad ki jingbam tynrai.
Ka prokram kan don ïa ki jingpyni business-to-business (B2B) bad ki business-to-consumer (B2C), ki jingïalang ban ïakynduh bad ki national buyers bad ki exporter, institutional procurement opportunities bad ki nongbei tyngka ba la shna khnang ban ïarap ïa ki karkhana trai ri ban pynheh ïa ki kam jong ki.
Yn pynlong ruh ïa ki jingialang ba ïadei bad ka branding, packaging, digital marketing, e-commerce, financial assistance, ki skhim sorkar bad ki rukom pynmih mar kiba neh ban ïarap ïa ki nongseng kam seng jam ban pynbha ïa ka jinglong jong ki mar bad ka jinglah ban ïakhun iwei ïa iwei pat.
Napdeng ki seng la khmih lynti ba kin ïashim bynta ki lang ka PRIME Meghalaya, ka Meghalaya Basin Management Agency (MBMA), ka tnad rep ka riang, ka Directorate of Food Processing, ka Meghalaya State Skill Development Society (MSSDS) bad kiwei kiwei ki jaka treikam kiba don bynta ha ka kam seng kam seng jam.
Ki nongpynïaid ki la ong ba kane ka jingthmu ka thmu ban pynkylla ïa ka kolshor ba riewspah jong ka Northeast sha ki lad kamai kiba lah ban neh da kaba ïarap ïa ki mar tynrai ban poi sha ki iew kiba kham heh katba ki dang thaw ïa ki lad kamai thymmai na ka bynta ki kynthei nongtrei kti bad ki nongpynmih mar nongkyndong.