Shillong, Naitung 19 : Ka jingsam ïa ki Enumeration Forms ha East Khasi Hills na bynta ka jingpyntreikam ïa ka Special Intensive Revision ka la kynjoh sha ka 92.10 persen da kaba dep ban sam haduh 5,17,611 tylli ki Enumeration Forms (EFs) na ki 5,62,001 ngut ki nongthep vote ha baroh ki 15 tylli ki Assembly Constituency jong ka distrik, kata haduh ka por 7 baje janmiet jong ka 19 tarik Naitung.
Ha ka kyrwoh ba la pyllait da ka ophis jong u District Election Officer, East Khasi Hills, ka jingpynkhreh ïa ka SIR ka la sdang naduh ka 30 tarik Jylliew, 2026, bad ka kynthup ïa baroh 898 tylli ki polling station. La ruh ba ka jingsam ïa ki Enumeration Forms ka dang ïaid beit ïaid ryntih bad ka jingïashim bynta jong ki paidbah ka long kaba ïaid beit ha baroh ki Assembly Constituency.
Shuh shuh la ïathuh ba ka District SIR Helpline ka la ïoh pdiang 98 tylli ki nong phone na ki paidbah haduh ka 19 tarik Naitung, bad baroh ki jingeh ba la wanrah da ki paidbah la lah ban pynbeit.
Ha ka liang ka jingsam ïa ki Enumeration Forms, ka Mawsynram Assembly Constituency ka la wan hakhmat eh da 99.77 persen, bud sa ka Mawkynrew da 99.66 persen, Mawphlang da 98.71 persen, Pynursla da 97.73 persen, Mawryngkneng da 96.58 persen, bad North Shillong da 96.34 persen.
Ha ka bynta ka jingdigitize ïa ki form, la pyntip ba haduh mynta la dep digitize haduh 1,68,705 tylli ki Enumeration Forms, kaba long 30.02 persen na baroh ki nongthep vote. Ka Pynursla ka la wan hakhmat eh ha ka digitization da 45.49 persen, bud sa ka Mawkynrew da 41.29 persen bad Mawsynram da 41.03 persen.
