Leit ai jingkyrshan ka Congress ïa ki samla pule ba ïakhih halor ka jinglait tuh ki jingkylli

Shillong, Naitung 20: U Secretary ka Meghalaya Pradesh Congress Committee (MPCC) Bah Manuel Badwar ha ka sngi Nyngkong, ula leit ïashim bynta lang ha ka jingïakhih jong ki samla pule ha Don Bosco Square, Laitumkhrah, ban ai ka jingkyrshan ïa ka jingdawa shim jingkitkhlieh halor ka jinglait tuh jong ki jingkylli bad ban wanrah ïa ka jingkylla ha ka pule puthi.
Haba ïakren bad ki nongpathai khubor, u Bah Badwar ula ong ba kane ka jingïakhih ka pyni ïa ka jingbitar jong ki samla ha kaba ka lawei ka jongki ka la shah ïuhroit noh.
“Ngi don hangne ban ai jingkyrshan bad jingsngewlem ïa ki samla pule baroh” ong u Bah Badwar.
“Kane kadei ka khyllipmat kaba kongsan. Ka jingbitar ki samla, khamtam ki samla pule kaba ka lawei ka jongki kala shah ktah jur bha da ki jingleh bakla jong ka sorkar, ka dei kaba shisha. Ka politik ka la leh ïa ka bynta kaba khraw ha ka pule puthi bad ïa ka sorkar ban shim ïa kane ba ka long kaba rit ka dei kaba bakla jur” ula ong.
Ula ong, ba ka jingïakhih kam dei satia halor ka politik hynrei ka dei namar ka jingsngew kutlad.
“Kine ki dei ki samla kiba lah nang lah stad, ki ban ym mih kumne. Hynrei namar ba ki sngew bynniaw bha. Ki longiing longsem kiba la iakhun tyngeh ban phah ïa ki khun sha ki skul ruh ki la sngew bynniaw. Haba ka politik ka la lehkai, ka wanrah ïa ka jingjia kaba ym poi pyrkhat ha ka pule puthi ïa kaba ka sorkar ka ïaleh ban kyntait ban leh eiei” ong u Bah Badwar.
Ha kaba ïadei bad ka jingdawa ba u Myntri ka Sorkar Pdeng uba khmih a ka pule puthi u dei ban hiar shuki noh, u Bah Badwar ula ong, ba ka Sorkar Pdeng ka la pulom ha ka ban leh eiei ïa katei ka jingjia kaba sngewkhia bha.
“Kane ka pyni ïa ka lawei jong ka ri, ka jylla bad ïa ka imlang sahlang ka jong ngi. Ka sorkar kan ym lah ban ïai bteng ban kyntait ïa kane bad ban bteng ban leh ïa ka kam ha ka lynti katba ka sngew mon. Kane ka pyni ba ka pule puthi kam don satia ha ka mat treikam ka jongki” ula ong.
U Bah Badwar ula ong, ba ka rukom treikam ka donkam ban pynbeit noh ha baroh ki liang.
“ïa kane ka rukom treikam donkam ban pynkylla bad pynthymmai noh. Lada ngim lah, ngin ïai bteng ban duh ïa ki jingmyntoi. Ka jingstad shimet jong ki briew kaba dei ban ïoh lyngba ka pule puthi kan ym wan shuh. Ha kane ka sngi bad ka juk, ka pule puthi ka dei kaba long pdeng ha ka ïoh ka kot bad ka roi ka par ha ka imlang sahlang” ula ong.
U Bah Badwar ula pynshai ba ka jingwan ki nongïalam ka MPCC ka long kum ki nongshong shnong.
“Ngi ïeng ryngkat bad ki samla pule bad ka ri hi baroh kawei. Ka Liang Pyrshah ha Delhi ka la rah tyngeh ïa kane ka mat bad ngi ngeit ba man la ki nongshong shnong ki dei ban ai jingkyrshan ïa ki” ula ong.
“Ngi don ryngkat lem bad ki bad ngin ïai bteng ban don bad ki. Ka lawei jong ka ri ka shong ha ka jingdonkam ban ïaid da ka lynti kaba thymmai, ym da kane ka lynti ïaid kaba ngi ïa don mynta” ula bynrap.