Shillong, Naitung 23: Ka United Democratic Party (UDP) ka la pynpaw ba kim don jingthmu satia ban weng noh na ka sorkar Meghalaya Democratic Alliance ba ïalam da ka NPP namar ki buh hakhmat eh ban wanrah ïa ka bor synshar kaba skhem bad kaba neh tad haduh ban da kut ka samoi.
“Ka UDP ka ieng ha ka nongrim ban pynneh ïa ka sorkar bad kata ngi kaba ngi ju ïakren barabor ban shim lang ïa ka jingkitkhlieh,” ong u General Secretary ka party, Dr. Jemino Mawthoh haba kren jubab halor ka jingkylli la kadei neem ka jingshisha ba ka UDP kan weng noh na ka sorkar halor ki jingkynnoh kiba bun kiba long pyrshah ïa ka sorkar haba ïadei bad ka bamsap.
U Dr. Jemino u la ai nuksa ruh ïa ki ar tylli ki District Council da kaba ong ba ba ha KHADC hapoh ka jingpynïaid jong u Bah Titos WChyne kum u CEM, ka EC ka skhem bad ka neh haduh mynta kumjuh ruh ha JHADC.
Hynrei watla katta pat u ong ba ha ka sainpyrthei pat ka ju don beit ka jingïadom ka jingïakynad man ka sngi tangba kaba donkam hi ka long kumno ban pynïa biang bad ban pynskhem pat ïa ka bor synshar.
“Ngi don ki nongïalam na baroh ki liang, kumta ngam ong ba baroh ka ïaid beit ha ka UDP hynrei ngi don pat ïa ka kynhun kaba trei ha ka party na ka bynta ban shakri ïaki paidbah. Kumta, la ka long ha ka party lane ha ka sorkar katei ruh kadei kajuh ka phang kaba ngi ieng ha ka nongrim ban wanrah ïa ka jingtreikam kaba skhem bad kaba neh,” u la ong.
Ha kawei pat ka liang, u Dr. Jemino u ong ruh ba naduh ka por jong u President ba rim, u Dr. Donkupar Roy u la ju banjur ïa ka jingdonkam ban pynkhlain ïa ki paty riewlum ba kan long ka bor kaba khlaiñ ha ka jylla Meghalaya. U ong ruh ba mynta kane ka la sdang ban wan dur bad na ka liang ka party ruh ki don ka jingkyrmen ba kiwei ki party riewlum kin sngewthuh ïa kane ka bynta.
