Shillong, Naitung 19 : U nongrwai ba pawnam na ka jylla, u Kitkupar Nongsiej, u la thaw histori da kaba long tang ma u marwei na India uba la lah ban poi sha ka Grand Finale jong ka World Championships of Performing Arts (WCOPA) 2026 kaba dang long mynta ha Las Vegas, Nevada, USA.
Katkum ka kyrwoh, la ïathuh ba u samla Kitkupar u la ïoh rung sha ka jingïakhun kaba khatduh hadien ba u la pyni ïa ka sap rwai kaba kyrpang ha ka jingïakhun Semi-Final kaba la long ha ka miet jong ka 18 tarik Naitung. Hadien ba la dep ki jingïakop Semi-Final, la pynbna ïa ka jingïoh jingïaid shaphrang jong u sha ka Grand Finale.
Ka WCOPA, kaba ju tip paidbah kum ka “Olympics of Performing Arts,” ka khring ïa ki samla donsap na palat 60 tylli ki ri ban ïa aireng ha ki bynta bapher bapher kum ka jingrwai, jingïashad, jingtem, jingïalehkai phlim, modelling bad kiwei ki sap pynbyrngia.
Ka Grand Finale, kaban long ha ka miet jong ka 20 tarik Naitung, kan kynthup ïa ki nongïashim bynta kiba ïoh ban ïaid shaphrang da kaba ïoh mark bun eh ha ki jingïakop bapher bapher. Ha katei ka jingïalang pynhap pyrda yn jied ïa u nongjop ba kongsan tam ban shah pynkup burom kum u Grand Champion Performer of the World, kawei na ki khusnam kiba khraw tam ha ka pyrthei jong ki riew donsap.
U Kitkupar, uba dei na ka shnong Kynshi ha Eastern West Khasi Hills District, u la pyni ïa ka sap kaba kynsai bha naduh ka jingïakop ba nyngkong haduh ka Semi-Final. Kum u dkhot jong ka Team India, u la pynhun ïa ki nongbishar na kylleng ka pyrthei da ka sur rwai jong u, ka jingïeng ha rynsan bad ka jingshlur ha ka jingïakop.
Ka lynti jong u sha kane ka rynsan pyrthei ka la sdang hadien ba u la long u nongjop ha ka Ka Sur Kynud Season 3, ka jingïakop rwai kaba heh tam ha Meghalaya kaba la pynlong da ka Don Bosco Media Network (DBMN). Hadien kata u la ïoh rung sha Team India lyngba ka jingjop ha ki online audition ba la pynlong na ka bynta ka WCOPA.
Shuwa ba un leit sha United States, la pynlong ïa ka jingai khublei kitbok bad ka jingïalang jingïaduwai kyrpang na ka bynta jong u ha Don Bosco Youth Centre (DBYC), Laitumkhrah, ha kaba ki nongïalam Balang, ki bahaïing hasem, ki paralok bad ki paidbah ki la duwai na ka bynta ka jingïaid lynti jong u.
Ka kyrwoh na u Director ka DBMNTV, la ïathuh ba hadien ba u la ïoh rung sha ka Grand Finale, na ka liang u samla Kitkupar u la pynpaw ïa ka jingsngewkmen eh bad u la ai khublei ïa U Blei bad ïa baroh kiba la kyrshan ïa u.
“Nga ai khublei ïa U Blei ba Kynrad uba la ïalam bad kyrkhu ïa nga manla ka por. Ka jingpoi sha ka Grand Finale jong ka WCOPA ka long ka jingphohsniew kaba la urlong bad ka jingsarong ym tang ïa nga hynrei ïa ka Meghalaya bad ka India ruh. Nga ai khublei shikatdei eh ïa ki kmie ki kpa jong nga, ki nonghikai jong nga, ka Don Bosco Media Network, ki nongkyrshan bad ïa baroh kiba la duwai na ka bynta jong nga. Ka jingkyrshan jong phi ka la ai bor ïa nga ban bteng ban ngeit ha lade.”
Shaphang ka jingpynkhreh na ka bynta ka Grand Finale, u la ong, “Ka jingpoi sha ka Final ka long ka burom kaba khraw, hynrei ka jingïaid lynti kam pat kut. Nga dang bteng ban pynkhreh da ka jingshimkhia kaba kham khraw, ban long uba pynleit jingmut bad ban ai ïa kaba bha tam jong nga ha rynsan. Nga tip ba ngan ïakynduh ïa ki nongïakhun kiba tbit tam na kylleng ka pyrthei, hynrei ngan ïalehkai da ka jingshlur, ka jingsngewrit bad ka jingsngewskhem, da kaba rah ïa ka kyrteng jong ka ri bad ka jylla. Nga kyrpad ïa baroh ban bteng ban duwai na ka bynta jong nga khnang ba ngan lah ban wanrah nam bad burom ïa ka India bad ka Meghalaya.”
Wat la ka jingïakop kaba khatduh kam pat long, hynrei ka jingpoi jong u Kitkupar sha ka Grand Finale ka la shah ñiew lypa kum ka jingjop kaba khraw ïa ka Meghalaya bad ka thaiñ Shatei Lam Mihngi, kaba pyni ba ki samla donsap na kane ka thaiñ ki lah ban ïakhun bad jingïaleh paidbah ha ka rynsan pyrthei.
Naba ka Grand Finale kan sa long ha ka 20 tarik Naitung, ki hajar ngut ki nongkyrshan na India bad na shabar ri ki dang bteng ban duwai bad ai mynsiem ïa u Kitkupar Nongsiej, da ka jingkyrmen ba un pyni biang ïa ka sap jong u bad rah ïa ka nam Grand Champion Performer of the World sha la ri.
