Shillong, Naitung 19: Ar ngut ki nongïalehkai karate jong ka All Meghalaya Karate-Do Association (AMKA) ki la lah ban wanrah nam da kaba khur takma ha ka 10th Cadet, Junior, U-21 & Senior South Asian Karate Championship 2026, kaba la long ha nongbah Dhaka, Bangladesh.
Kine ki kynthup ïa u Daniel Dabiangbha Warjri, uba la jop takma ksiar ha ka Individual Kumite (-68kg) jong ki khynnah shynrang (Junior), katba u Gideon Tympuin u la khur takma rnong ha ka Men’s U-21 Individual Kata.
Na ka liang jong ka AMKA ka dap da ka jingsngew kmen kaba khraw halor kane ka jingjop jong kine ki arngut, kaba pyni ïa ka kyrdan kaba nang kiew jong ki nongïalehkai karateka jong ka synjuk ha ki lympung ïakop ha ka thaiñ, ha ka ri bad ha ka pyrthei (Regional, National & International).
Kine ki arngut ki nongïalehkai karate jong ka Meghalaya ki la shah jied katkum ka jinglad jong ki ban ïalehkai bha mynta une u snem. U Gideon u la ïoh ban khur ïa ka takma ksiar na ka bynta ka jylla Meghalaya ha ka lympung ‘5th KIO Senior & U-21 National Karate Championship 2026’ kaba la long ha New Delhi hapdeng u bnai Rymphang bad Lber, katba u Daniel u la ïoh ban khur ïa ka takma rupa ha ka Individual Kumite -68kg jong ka 5th KIO Sub-Junior, Cadet & Junior National Karate Championship 2026, kaba la long ha Dehradun ha u bnai Jylliew.
Ka jingjop jong kine arngut ha ka lympung ha Bangladesh ka la wanbud hadien ka jingjop takma rnong jong ka Kynjailin Lyngdoh Mawnai ha kane kajuh ka lympung kaba la long ha Colombo, Sri Lanka.
Haba phai dien shuh, ka Wandahunshisha Mawblei ka la khur ïa ka takma ksiar ha ka por ba pynlong ïa kane ka lympung ha Dhaka ha u bnai Naiwieng, snem 2019.
