Rah biang ka Minerva Academy na India ïa ka World Youth Cup

NEW DELHI, Naitung 19: Ki khynnah ïalehkai shynrang ba hapoh 12 snem (U-12) jong ka Minerva Academy ki la bynrap sa kawei pat ka nam lahduh da kaba jop bad ïada ïa ka Gothia Cup hadien ba ki la pynliem noh ïa ka RS Sports Yellow, kaba dei ka kynhun ïalehkai na Brazil da 2-1 ha ka phainal kaba itynnad bha.
Kane ka jingjop ka wan tang hadien shi taïew ba kane ka Academy kaba don ha Chandigarh, ka la ïoh ban pynskhem ïalade kum ka lahduh jong ka Helsinki Cup, kaba pynkut ïa kawei pat ka jingleit ïashim bynta sha Europe kaba sah jingkynmaw.
Lah ban kdew ba ka jingjop ha ka Helsinki Cup ka la pynurlong ïa ki kam kiba dang sahkut naduh u snem ba la dep, katba ka Gothia Cup ka dei shaphang ban pynshisha ba ka kynhun ka dei hok ban don ha ka kyrdan ba ha khlieh duh.
Da kaba rah ïa ka nam lahduh, ka Minerva ka la pyni sa shisien balei ba ki la kylla long kawei na ki shlem ai jinghikai kaba la ñiew burom shabar jong ka Europe.
Haba phai sha ka jingïalehkai, u Kipgen Thangsanglen u la pynkhihjar nyngkong na ka bynta ka Minerva shuwa ba ka Brazil kan pynïakhaid. Hynrei u Mekhamkhraw Nongrem u la buh biang hakhmat ïa la ka jong ka kynhun da kaba thep na ka free-kick. Nangta ki khynnah ïalehkai ki la ïada pyneh triang ïa ka kol lamkhmat ban ïoh khur ïa ka khusnam Gothia Cup ha kaba arsien lynter.
Kane ka jingjop kaba khatduh ka bteng ïa ka jingïaid lynti kaba kyrpang na ka bynta ka Academy, kaba la pynlut ïa ki ar snem ba la dep ban phriang khubor ha kylleng ka dewbah Europe da ka jingïalehkai kaba itynnad bad ki jingïakhun ban jop ïa ki khusnam.
Ka jingïaid lynti jong ka Minerva ha kane ka World Youth Cup:
Group Stage
Pynliem ïa ka Prep Schools Pumas Blue (England) 12-0
Pynliem ïa ka Lillestrom SK 3 (Norway) 13-1
Pynliem ïa ka Surte IS FK (Sweden) 16-0
Round of 64
Pynliem ïa ka Legacy Academy (Kenya) 6-2
Round of 32
Pynliem ïa ka Prep Schools Lions (England) 10-1
Round of 16
Pynliem ïa ka OFC Couronnes (France) 17-1
Quarter-final
Pynliem ïa ka Cancheritos FC (Bolivia) 8-0
Semi-final
Pynliem ïa ka FC Lokomotyv Kyiv (Ukraine) 3-2
Final
Pynliem ïa ka RS Sports Yellow (Brazil) 2-1