SHILLONG, Naitung 19: Ka Mawpdang SC ka la lah ba kan pynliem noh da 2-0 kol ïa ka Sei La Sap FCC ban jop ïa ka jingïakhun phainal jong ka lympung U-20 Fourth Division 2026 ba la pynïaid da ka Shillong Sports Association ha ka sngi Saitjaiñ ha madan First Ground- SSA Stadium.
Ka Mawpdang ka la lah ba kan tehlakam bun shah ïa ka jingïalehkai ha ka kylla step bad pynkhihjar dang kloi ha ka minit kaba 10 lyngba u Banaijingshai Kharkongor.
Na ka liang jong ka Sei La Sap, ka la pyrshang katba lah ban wanphai hynrei ki rangap dien bad u rangap kol jong ka Mawpdang ki la pyneh triang ban khanglad ïa kino kino ki jingpyrshang jong ka liang pyrshah.
Hapdeng ka jingïakhun kaba itynnad ka Mawpdang ka la pynskhem ïa ka jingjop da kaba pynkhihjar ha ki minit ba khatduh lyngba u Marbiang Kharbhih (80’).
Kum ka lahduh ka Mawpdang ïohrah ïa ka song khusnam kaba Rs 60,000 tyngka ryngkat ka trophy ba la sam da u President ka SSA u Bah Banteidor Lyngdoh. Katba ka Sei La Sap, kaba la pynkut ïa ka samoi ha ka kyrdan ba ar, ka la ïohpdiang ïa ka khusnam pisa kaba Rs 30,000 tyngka.
La sam ruh ïa ki khusnam shimet sha ki rangïalehkai ba kynsai, ha kaba u Embhahlang Khongnoh, rangap kol ka Mawpdang, uba la trei shitom ban kyntait ïa bun tylli ki jingpyrshang u la khur ïa ka khusnam Player of the Final. Nangta ïa ka khusnam ‘Nongthep kol ba bun tam’ lane Top Scorer la khur da ar ngut ki rangïalehkai, u Marbiang Kharbhih jong ka Mawpdang bad u Shaphrangshai Rani jong ka Nongkseh United, ha kaba baroh arngut ki la thep mar 10 kol.
Wat hadien ba la kut ka phainal, ka jingïakhun kam pat kut na ka bynta ka Mawpdang bad ka Sei La Sap, namar da kaba poi sha ka phainal, ki la pynthikna ïalade ban rung sha ka SSA Champions Cup. Nalor kata, baroh arliang, ryngkat bad ki ar tylli ki kynhun kiba shah rem ha ka Semi final, kata ka Golflink SC bad ka Weilyngkut Area FCC kin shah kyntiew kyrdan sha ka Third Division ha u snem ban wan.
