Ka CM Connect Centre ha Sohïong : Phah plie u Conrad ha u shipai ba la shongthait ïa ka Block Integrated Development Office

Shillong, Naitung 18: U Myntri Rangbah ka Jylla Meghalaya, u Conrad K. Sangma ha ka sngi Saitjaiñ u la kyrpad ïa uwei u shipai uba la shongthait-ym dei u myntri ne u heh sorkar-ban plie ïa ka ophis sorkar kaba dang shu tei thymmai ha Sohiong, da kaba ong ba ki jingtei paidbah ki dei ban long kiba la aiti da ki paidbah kiba la thmu ban shakri.
Ïa kane ka Block Integrated Development Office kaba la kot sha ka ?2.77 klur ha Sohiong C&RD Block la plie da u Pyntngenlang Nongrang na ka shnong Nongur, uba la shakri haduh 17 snem ha ka 1st Assam Regiment jong ki shipai Indian Army, ha ka prokram ha kaba u Myntri Rangbah ka Jylla ula plie ruh ïa ka CM Connect Centre kaba kot haduh ?146 klur.
“Watla ka la long ka rukom ba ïa ki ïing sorkar bad ki jingtei la plie da u kongsan ne ki riew pawkhmat, nga ngeit ba ha ka jaka kata dei ban plie da ki briew kiba napoh ka imlang sahlang.Ka ai burom ïa ki briew trai shnong bad ka pynlong ïa ka jingkmen kaba kham don jingmut”, la ong u Sangma.
Da kaba khot ïa ka kum ka “sngi kaba kyrpang” na ka bynta ka Sohiong, u Myntri Rangbah ka Jylla u la aiti ïa ki 8 tylli ki projek ba la dep kiba shongdor ?5.48 klur sha ki paidbah bad u la buh ïa ki maw nongrim na ka bynta khyndai tylli ki projek thymmai kiba shongdor ?140.74 klur, kiba kynthup ïa ka jingpynbiang um dih, ki surok nongkyndong, ki jingtei ha ka kam jngohkai pyrthei bad ki jaka ïalehkai, ki jaka pyntuid um ka tnad irrigation.
Napdeng ki projek ba kongsan ba la pynbna ki long ka jingpynheh ïa ka Greater Sohiong Water Supply Scheme kaba ?34.53 klur, ar tylli ki surok kiba shongdor ?20.58 klur, ka Dewlieh Mawrisnai Flow Irrigation Project, Kynroh Viewpoint, Sohiong Viewpoint, Nongkasen Tree House bad Lum Diengiei.
Ka sorkar ka la plie ruh ïa ki katto katne ki jaka ba iadei bad ka imlang sahlang ne ka community-focused facilities, kynthup ïa ka CM Connect Centre, ka Block Resource Centre na ka bynta ki skul, ki digital library bad ki jaka pule ba lah ban pyndonkam da ka internet ha ki 13 tylli ki shnong, ka plastic waste management unit, ka marketing centres na ka bynta ki nongrep bad ka Agricab storage and marketing facility kaba thmu ban pynbha ïa ka ioh ka kot.
Ha ka jingïakren paidbah jong ka CM Connect, ki nongshong shnong ki la pynpaw ïa ki jingsngewkhia halor ka jingtwa khyndew namar ka jingjur jong u slap, ka jingpynslem ïa ka Chief Minister’s Solar Mission, ka jingbym lah ban pynïasoh ïa ki mobile ha ki katto katne ki shnong, ka jingduna um dih, ka jingbym biang ki jaka buh marbam bad ka jingdonkam ïa ki mar rep bad ka schools and vocational training centres jong ka sorkar.
Ha kane ka sngi la ïa don lang u Bah Sosthenes Sohtun u Myntri Sorkar ba peit ïa ka Community and Rural Development, u MLA ka Sohiong u Bah Synshar Kupar Roy Lyngdoh Thabah, u Bah Samlin Malniang bad ki heh heh ophisar.