Jowai, Naitung 23: Ka Jaiñtia Body Building & Fitness Association (JBB&FA) kala ai ka jingïaroh ïa uwei ïa u samla Raymond Nongkhlaw uba la jop haka kyrdan ba ar ha ka rynsan pyni dohksah baheh duh ka ‘Mr Universe Championship” kaba dang su dep pynlong shen ha Bangkok jong ka ri Thailand.
Halor ka kane ka jingjop jong u ka JBB&FA ka ai khublei kyrpang ïa utei u samla uba la lab ban wanrah ïa ka nam ka burom ym tang ïa ka jylla hynrei wa ïa ka ri hi baroh kawei.
Ha ka juh ka por ka JBB&FA ka kyntu jur ïa ka sorkar jylla lyngba u myntri ka kam ïalehkai bad kumjuh ïa u myntri rangbah ba kin ïaleh kumno ban wad ki lad ki lynti na ka bynta ban pynkiew ïa kum kine ki rynsan ïalehkai hapoh ka jylla.
Ka JBB&FA kala dawa ruh ba ka sorkar ka dei ban pynïoh kam ïa kum kine ki rang ïalehkai kiba la wanrah burom ïa ka jylla, hynrei lada na ka liang ka sorkar kam don kono kano ka jingkitkhlieh ïa ki rangïalehkai ka jylla kala long pynban kum ka lad ban pynduh mynsiem ïa ki.
