Pynrem ka UHM ïa ki ‘riew thrang snam kiba kam ïalade kum ki dkhot ka FKJGP

Mawkyrwat, ‘Naitung, 23: Ka United Hynñiewtrep Movement (UHM) jong ka South West Khasi Hills District ka sngewban pynrem jur halor ka jingshah thombor u nongïalam Rangbah ka seng u bah Charlie J Rani ha ki ‘riew thrang snam kiba kam ïa lade ba ki dei ki dkhot ka FKJGP kiba la thmu ban shim syndon ïa ka jingim jong u ryngkat ïa u Sports Secretary, u samla Michael B. Dkhar bad kumjuh ruh ban kit jubor ïa u Assistant Organising Secretary, bah George Iawphniaw kata ruh ha ka por mynstep 11 baje kata ha ka 15 tarik u ‘Naitung, 2022 ha Mawlai, Mawdatbaki.
Katkum ka jingshong jingialang ba kyrkieh jong ki dkhot jong ki Unit bad ki Circle bapher bapher jong ka South West Khasi Hills District mynta ka sngi kata 19 tatik u ‘Naitung, 2022 ki lah shim beit kawei ka rai ba lada ka FKJGP kan don bynta shisha ha ka jingthombor ïa u President Rangbah jong ngi, ngi kum ka seng baroh kawei na ka South West Khasi Hills District ngin nym ithuh shuh ïa ka FKJGP bad ka jingïadei bad kan dkut noh naduh mynta hi naduh ba pyllait ïa une u kyrwoh katba ka FKJGP kam pat lah ban ai ïa ka jingpynshai.
Ha kawei ka liang ka seng UHM ka buh jingkylli ïa kine ki ‘riew thrang snam ba ha kano ka rukom ki nud ban wan thombor kat ïa u President Rangbah jong ngi kata ruh mynsngi mynshaiï Lada don kano kano kaba u nongïalam jong ngi u lah leh bakla ne kren ne kynthoh bakla ïa kane ka seng, ka jingïakren ka dei ban don lane ka aiñ ka don ban bishar ym pat ban shu leit thombor ïa u na ïing sah.
Kyntang ïa wai ka seng hi ka sngewban kyntu ïa ki bor ka aiñ ba kin shimkhia bad ban pynsted ban kem ïa kine ki ‘riew thrang snam bad ban pynshitom ïa ki katkum ki kyndon aiñ. Ka seng hi baroh kawei ka sngewban ai ruh ka khubor sngewlem sha ka ïing ka sem jong u nongïalam Rangbah jong ngi bad ba un ïoh noh ïa ka met ba shait ba khlaiñ watla mynta u dang don hapoh jingsumar.
Kane ka long katkum ka kyrwoh lyngba u Publicity Secretary ka UHM, u bah Kitbok Wanniang.