Mawkyrwat, ‘Naitung, 23: Ki shipai Border Security Force (BSF) jong ka Meghalaya ha ka 21/07/2022 ki la ïoh ban kem noh ïa ki ar ngut ki briew ha ryngkat ka pisa thok kaba kot haduh 47 hajar tyngka.
Ha ka tyllong khubor na ka Meghalaya Frontier BSF Shillong la ong ka jingïoh kem ïa ki la long hadien ba ki la pynlong ka jingpeit pyrman ryngkat ka jingtrei shitom ha ki khappud ne International Border la ïoh ban kem bad kurup ïa ka pisa thok ne ‘Fake Indian Currency Notes’ kaba kot T. 47,000/- (kiba dei da ka lut 500) na ka khappud South West Khasi Hills District, Meghalaya.
La ïathuh ruh ba ïa kane pisa thok la rah da ki ar ngut ki briew kiba dei ki nong India kata u Biswajit Paul bad u Marmush Marak kine baroh ki dei na South West Khasi Hills District, Meghalaya. “Kane ka pisa thok ba la kurup ka dei ba la shna hapoh Pakistan”, ong ka tyllong khubor.
Namarkata, ki shipai BSF ki la pynlong ka jingpahara kaba khlaiñ ban long ha kajuh ka por kiba peitngor bha ïa ka ïaid ka ïeng ha ki jaka khappud ne ki International Border khnang ba yn lah ban tehlakam ïa ki kam sniew bad kumjuh ruh ïa ki jingkhaïi be-aiñ.
