Khyndiat shaphang ka Lehniam Behdeiñkhlam kaba mynta u snem 2026, Seiñ Raij Tuber EJHD

Khliehriat Naitung 17: – Ka leh niam Behdeiñkhlam ka dei kaba ki ju pynlong man la u snem bad kane ka dei ka jingleh niam jong ki niam tre na ri lum Jaiñtia, ka jingleh niam kaba la buh bad la pruid dak da u men barim naduh ki por hyndai, kaba da ka Kñia ka khriam, ka suit ka shor ban beh ïa ka khlam sha jngai bah.
Ka lehniam Behdeiñkhlam jong ka Seiñ Raij Tuber na East Jaiñtia Hills District ka dei ka jinglehniam kaba heh tam ha ri lum Jaiñtia bad kane ka jingleh niam ka dei ka jingngeit tynrai kaba naduh hyndai ban beh noh ïa ka khlam ban lait na la pang ka shitom, lait na kiei kiei kiba sniew bad ruh ban long ban man bha ka rep ka riang, ban bha ban miat ki longïing, longsem, ban koit ban khiah krat.
Khyndiat shaphang ka Behdeiñkhlam kaba mynta u snem 2026, ka Seiñ Raij Tuber ka la pynkut mynta ka sngi ka 17 tarik u bnai naitung 2026 bad la wan ban sakhi lang da u myntri rangbah ka jylla, u Conrad Sangma kum u Kongsan bad u Symbud Myntri rangbah, u Bah Sniawbhalang Dhar kum u Symbud Kongsan.
Mynta ka sngi ka 17 tarik u naitung 2026, ka Seiñ Raij Tuber ka la pynkut ïa ka jingleh niam Behdeiñkhlam da Kñia Beh Khlam kaba la suit la shor ha ka por 5 baje mynstep, ha ka por 6 baje mynstep pat la leh ïa ka Kñia ka khriam kaba ki khot da ka ‘Beh Khlam ki Wasan Raij”, shuh shuh ha ka por 8 baje mynstep la leh sa kawei ka jinglehniam kaba ki khot da ka ‘ïa Boh Tan Bhang Blai’, ha ka por 8.50 mynstep pat la leh ïa ka Kñia ka khriam ba la tip kum ka Ei Nguh u Lyngdoh ki Wasan wa u Tymmen shnong uba dei u Waheh Shnong Tuber Kmaishnong ïa kane ka leh ha Biar Aitnar, ha ka por 11.30 mynstep pat ka Sein Raij Tuber ka la leh shuh shuh ïa ka Kñia ka khriam kaba ki ong ka ” Rap Klong ki Neng na u Sangot ha Kordeinlin bad ka Rap Klong ki Phang Wah na u Longdoh ha Lum Pongdeng” Hadein kine ki jingleh niam ki Waheh Wasan ki ap sa ïa ki Rong ne ki rot ki ban wan poi ha ka Biar Aitnar bad dei ha ka por 1 baje mynsngi la wan poi lut ki rong ne ki rot hapoh ka lympung Biar Aitnar nangta pat kin sa sdang da ka shad mastieh ban beh ïa ka khlam bud pat sa ka ïa tan Bhang, hadien kane ha shwa ban kut ka Behdeiñkhlam kin sa bret ne noh ïa ki rong sha ka jaka ba la dep pynkhreh lypa.
Ha shwa kane ka sngi ba kut ka Behdeinkhlam, ki Seiñ Raij Shnong, kiba na ki shnong bapher bapher kiba hap hapoh ka Seiñ Raij Tuber ki la pynlong ia ki Kñia ki khriam, kumjuh ruh ka shad ka mastieh ha la ki jong ki shnong, ki dong bad ki thaiñ bad mynta ka sngi ki la ïa poi lang ha ka lympung Biar Aitnar ha Tuber Kmaishnong bad pynkut ïa ka Behdeiñkhlam da kaba bret bad noh ïa ki rong ba la dep Kñia ha ka jaka ba la dep pynkhreh lypa bad ha ka por 4 baje janmiet la pynkut da ka jingleh niam kaba ki khot ka ” ia slait niam”.