Shillong, Naitung 17: Ka kynhun ki nongshet Ja (Midday Meal) ïa ki khynnah skul ïa kaba la tip kum ka Union of Cook Cum Helper PM Poshan Meghalaya na ka tnad West Khasi Hills District mynta ka sngi ka la pynlong ïa ka jingïalang paidbah kum kawei na ki dorbar bah ki Nongshet Ja ha ka shnong Pyndengrei Nongstoiñ West Khasi Hills District.
Shuwa ban sdang ïa ka jingïalang ka seng kum ka dak ban kynmaw burom ia u Tirot Sing Syiem kala pynlong ruh ïa ka jingsngap jar kaba shi minit.
Ha katei ka jingïalang la ïohi ruh ba ki Nongshet Ja kiba na ki skul bapher bapher kat kiba dang hap hapoh ka West Khasi Hills District ki la ïatuid khrui ban ïashimbynta lang ban ïathir jingmut na ka bynta ki mat kiba donkam jong ka seng.
Ka seng hadien ka jingialang haba ïakren bad u nongthoh khubor ka la pynpaw ïa ka jingeh namar ka jingsiew dor rit palat ka sorkar ïa ki dkhot jong ka seng ha kaba kat haduh kine ki sngi, ki dang ïoh tang 2 hajar tyngka shi bnai kumta ha kum kane ka juk kaba la kiewdor lut ki jingdonkam ka la pynshem jingeh ban pyndap na ka bynta ka lut ka sep ha la ïing, namar kata ka seng ka dawa ban pynkiew noh ïa ka jingsiew na ka 2 hajar sha ka 9 hajar shibnai.
Ym tang katta hynrei ka seng ka la dawa ruh na ka sorkar ba kan siewnoh ïa ka onorium kaba ym pat la ïoh mynta na ka bynta ka 3 bnai kynthih haduh kine ki sngi.
Ha katei ka sngi la ïadonlang ruh u bah Khroo L Pariat Adviser Sengkmie, kong Gina Nengnong President na ka Sengkmie bad la pynïaid ïa katei ka jingïalang da ka kong Peaceful Marweiñ President ka Union of Cook Cum Helper PM Poshan Meghalaya tnad jong ka West Khasi Hills District.
