Sngewnguh ka KSU ba rai ka sorkar ban wanrah da ka Resolution ban khang tih Uranium

Shillong, Naitung 17: Ka Khasi Student Union (KSU) mynta ka sngi Thohdieng ka la pynlong ïa ka jingkynmaw burom ïa ka lyngkhuh sngi iap kaba 191 jong u Syiem Tirot Sing Syiem, da ka ba pynlong ïa ka jingïalang bad buh syntiew ha u Motsahnam jong une u Khlawait ka Ri uba don ha Madan Iewrynghep, Laitumkhrah.
Ha kane ka jingkynmaw burom la wan ban ïashim bynta da ki nongïalam ka KSU kiba mynta bad kiba rim, ki nongïalam na ka Federation of Khasi Jaintia and Garo Peoples, North East Students Organisation bad kiwei kiwei.
Haba kren ha ka jingïalang u President ka KSU u Samla Raymond Kharjana ula ong, ba ka KSU ka pynpaw ka jingsngewnguh ïa ka rai jong ka Sorkar Jylla ban mynjur da ka Resolution ban pyrshah tih Uranium hapoh ka Jylla Meghalaya hynrei ula ban jur ba ka jingmynjur ïa ka Resolution kam dei ka lynti kaba la kut halor kane ka mat.
Ula ong, hadien ba ka seng ka la sdang ban khyllie biang ïa kane ka mat, ka la lap ba kiba bun ki riew pawkhmat jong ka Jylla ki la sdang ban hiar sha ka thaiñ Domiasiat South West Khasi Hills ban pyntieng pynsmiej ïa ki paradoh parasnam.
“Hooid ngi sngewthuh bad ngi ïohi ba ka Sorkar kan mynjur ïa kata ka Resolution hynrei kaba kongsan ka long ba ka Sorkar ka dei ban pynlong ïa ka jingtih bniah ba balei kita ki riew shimet ki sdang ban shim ïa ki jaka ha kitei ki thaiñ” la ong u samla Raymond.
“Ka KSU kam tieng ban pha ïa la ka jong ka jingim bad kam kynran dien ban shim ïa ka jingim jong ki mynder ri kiba thmu ban pynkylla langïong ïa ki paradoh parasnam jong ka ri bad ka jaidbynriew” la ong u Nongïalam ka KSU bad ka bynrap, dang shen ka KSU ka la ïakynduh ïa u Myntri Rangbah bad ka la ban jur ba ka Jylla haduh mynta kam don kano kano ka aiñ ban tehlakam ïa ka jingwan rung ki mynder ri sha kane ka Jylla.
“Kala dei ka por ba ka Sorkar kan pyni ïa kata ka jingshim khia bad ka jingkitkhlieh namar kumba ngi ong ba ka jaidbynriew jong ngi kadei kaba rit paid bad ngi don ha ka jinglong syier ïoh ha kawei ka sngi ngin shah tyllep bad jah noh na kane ka snieh jong ka pyrthei” la ong u President ka KSU.
“Haba ngi ïakren ïa ka Resolution jong ka ILP, haduh mynta mynne ngi dang sah haka umdum. Nangne shakhmat ngin long kiba adkar namar ngi la ïohi ba la Pass ïa ka Resolution na kawei ka por sha kawei pat hynrei ngim shym la ïohi ïa u soh jong ka jingjop wat hadien ba la Pass ïa ka Resolution ruh” ula ong.