Ki don kumba 12 ngut ki koidi kiba don hapdeng 70 bad 80 snem ha kylleng ki phatok ha Meghalaya

Shillong, Naitung 17: Ki don 12 ngut ki koidi kiba don hapdeng 70 bad 80 snem mynta ha ki phatok ha kylleng ka jylla Meghalaya, la pyntip ka High Court ha ka sngi Palei.
Haka hearing a petition, ka division bench jong ka Chief Justice ka Revati Mohite Dere bad u Justice W Diengdoh ki la bishar bniah ïa ka kaiphod jong ka jinglong jingman ba la aiti da ka Jylla bad ba la aiti da u Additional Advocate General u K Khan katkum ka hukum jong ka ha ka 10 tarik u Jylliew.
Kat kum ka kaiphod, ba la phiah ka long “5 ngut ha phatok Shillong Jail, uwei ha Nongpoh Jail, uwei ha Jowai Jail, saw ngut ha Tura Jail bad uwei ha Williamnagar Jail.”
“Da kaba pyrkhat ïa kiei kiei kiba la kdew haneng, ngi kyrpad ïa u Khan ban ai ïa ngi ïa ki jingtip ba bniah shaphang ki mukotduma kiba dang sah teng pyrshah ïa kine ki briew… bad ka kyrdan ha kaba ki mukotduma jong ki ka ieng”, la ong ka ïingbishar.
Ka Kashari ka la bthah ruh ïa u AAG ban pyntip “haduh katno kine ki briew ki la don ha phatok bad hato ki don kano kano ka jingpang/jingduna ha ki dkhot met.”
Ka bench ka la shim shuh shuh ïa ka kaiphod halor ka jingleit jngoh ïa ka phatok Williamnagar kaba la aiti da u Amicus Curiae T Yangi B.
Da kaba kdew ba u Amicus u la kdew ïa ka “jingeh shimet,” la pynkynriah noh ïa kane ka kam sha ka 10 tarik u Nailur 2026.