Nongpoh, Naitung 16: Kum shi bynta ban pynsngewthuh paidbah shaphang ka Special Intensive Revision (SIR) jong ka Electoral Roll bad khamtam ban ai ka jingtip kaba iar sha ki paidbah halor ka hok ban thep vote, ka ophis u Deputy Commissioner ka Ri-Bhoi District lyngba ka Election Branch, ha ka jingïatreilang bad ka ophis u District Sports Officer, Ri-Bhoi District haka step jong ka 16 tarik Naitung ka la pynlong ïa ka jingïakop mareh thong kaba 5 kilometre, kaba la tip kum ka “Run for SIR”.
Ïa kane ka jingïakop la sdang na Saiden Indoor Stadium bad pynkut pat ha NSCA Indoor Stadium, Umlyngkdait, ha kaba la sakhi ïa ka jingïashim bynta shitrhem jong ki spah ngut ki samla shynrang bad kynthei na kylleng ka Ri-Bhoi District. Ki heh ophisar jong ka District ruh ki la mih ban mareh lang bad ki nongïashim bynta kum ka dak ban ai mynsiem.
Ïa kane ka jingïakop la plie paidbah da kaba kaweh lama da ka Kong Balakyntiew Ranee, Additional Deputy Commissioner ka Ri-Bhoi District, ha ka jingdonlang u Bah Andrew L. Myrthong, Assistant Commissioner bad BDO ka Umsning C&RD Block, u Bah G Mylliem, Assistant Commissioner bad BDO ka Mawhati C&RD Block, u Akash Marak, Assistant Commissioner, u Bah Bobby L. Nongbet, District Sports Officer ka Ri-Bhoi, lem bad kiwei pat ki sahep sorkar.
Ha ka jingïakop mareh jong ki shynrang, u Lapynkhraw Thabah u la rah ïa ka nam lahduh, bud sa u Kobarlin Doloi ha ka kyrdan ba ar bad u Wincent Dia ha ka kyrdan ba lai. Ha ka liang ki kynthei pat, ka Jeny Ramde ka la wan nyngkong, bud sa ka Dakati Kyndait ha ka kyrdan ba ar bad ka Julina Bongrung ha ka kyrdan ba lai.
Kum ka jingai mynsiem ïa kitei ki samla kiba la rah ïaka nam jop naka liang ki bor pynïaid kila sam ruh ïaki khusnam pisa ha kaba kiba wan nyngkong ki ioh khur ïaka song pisa kaba 6 hajar, kiba wan ba ar 4 hajar bad kiba wan haka kyrdan ba lai ki khur mar 2 hajar tyngka.
