Dei ka jingjaituh ka MeECL ba khlad ki heprit ha ka shnong Umtangling

Nongpoh, Naitung 16: Hadien ka jingiap lai ngut ki heprit naka shnong Umtangling haka thaiñ Umroi Ri-Bhoi District bala kynnoh ruh ba dei tang naka daw ka jingthurmur ka tnad MeECL ka bym shym la shimkhia ban pynbha ïaki wire ilektrik wat hadien ba u Rangbah Shnong u la dep ban ujor sha ki bor ba dei peit, ka Synjuk ki Rangbah Shnong, Ri-Bhoi Mihngi mynta ka sngi kala leit ban ïakynduh syndon ïa u Dr. Abhishek Saini Deputy Commissioner ka Ri-Bhoi ban ai syndon da ka jingthoh ba ka sorkar ka dei ban siew bai lutksan sha ka longiing jong kitei ki heprit kiba la duh noh ïala ka jingim.
Kum ban shu kdew hangne haka janmiet jong ka 15 tarik Naitung haka por kumba 2 baje eiei lai ngut ki khynnah rit ki dang ïaid lynti bad shah lympat haka bording ilektrik hadien ba u sainar u la hap ha madan haduh ba kin da khlad syndon ha katei ka jaka bad kitei ki heprit kiba la khlad noh kidei kiba la tip kyrteng kum u John Paul Nonglang 13 snem ka rta, u Hamepynshai Nonglang 11 snem ka rta kiba dei shipara bad u Prainingstar Mawlong 15 snem ka rta.
Haba kren sha ki lad pathai khubor hadien ka jingïakynduh bad u DC naka liang u Bah PB Sylliang Chairman ka Synjuk ki Rangbah Shnong, Ri-Bhoi Mihngi haka jingdonlang u Bah Ailong Pariat General Secretary lem bad ki dkhot u la ong ba tang mar sien ioh jingtip ïa katei ka jingjia ba sngewsih naka liang ka Synjuk kila leit mih sha katei ka shnong bad ban leit sngewlem ïa katei ka longiing kaba la mad ïaka jingkthang ka mynsiem hadien bala duh noh ïaki jong ki khun.
Shuh shuh tang hadien ka jingwan sngewlem naka liang ka Synjuk mar mar kila leit ban ïakynduh bad u Deputy Commissioner ka Ri-Bhoi District ban leit buh syndon da ka jingthoh ba ka tnad MeECL ka dei ban siew ïaka bai lutksan sha ka longiing jong kitei ki heprit, kam dei ba ïa peiñ bad ka mynsiem hynrei kum ka jingïarap naka bynta ka longiing kaba mad ïaka jingjia ba sngewsih.
Naka liang ka synjuk kala kyrpad ruh ïa u DC ka Ri-Bhoi ba un bthah ïaki ophisar ba kim dei ban jaituh than namar katkum ka jingtip jong ki, u Rangbah Shnong ka shnong Umtangling dang haka sngi nyngkong bala dep u dang wan ban ujor hynrei haduh mynta kam don ka jingkitkhia tad haduh ba lai ngut ki mynsiem kin duh noh na kane ka sla pyrthei bad kum kine ki jingjia kim dei ban dang jia shuh nangne shakhmat bad hakajuh ka por ba ka sorkar ka dei ban siew ïaka bai lutksan haka por kaba biang.