Ka jaka mane Blei ki dei ban long ha ki jaka ba kyrpang ym ha ki ophis Sorkar : AL Hek

Shillong, Naitung 15 : U MLA ka Pynthorumkhrah bad Nongïalam ka BJP u Bah Alexander Laloo Hek ha ka sngi Balang ula ong ba ki Ophis Sorkar kim dei ban kylla long ki jaka mane Blei. Ki jaka mane Blei ki dei ban long ha ki jaka ba kyrpang jong ki seng niam, kynhun ne riewshimet.
Kane ka jingkynthoh jong u kala mih tang shisngi hadien ba ka Khasi Students’ Union (KSU) ka la khang tala ïa ka mandir ba la shna beaiñ ha phyllaw jong ka ophis ka Central Bureau of Investigation (CBI) ha New Shillong bad dawa ban pynpra noh ïa ka hapoh ka shitaiew.
Haba kylli halor ka jingleh ka KSU, u Bah Hek ula ong ba kane ka kam ka dei satia halor ka jingkyrshan ne jingpyrshah ïa ka jingpynsangeh ïa ka jingtei. Hynrei, ula pynpaw ïa ka jingsngew shimet ba ki jaka mane blei kim dei ban don ha ki jaka treikam paidbah.
“Ki jaka mane Blei ki dei ban don ha ki jaka shimet, ym ha ki jaka shakri paidbah la ka dei ha ki Ophis ka Sorkar Jylla lane Sorkar Pdeng” ong u Bah Hek.Une u Nongthaw Aiñ ula pynksan ba ki Ophis ka Sorkar lane jaka paidbah ki dei kiba rung ba mih ki briew kiba dei na ki jaidbynriew ne niam bapher bapher.