Shillong, Naitung 15 : Ka North Eastern Council (NEC) ka la pynlait ïa palat 13.58 klur tyngka ka song pisa na ka bynta ban pyntrei ïa ki project kam pynroi bapher bapher ha Meghalaya ha kine ki arbnai ba la lah, da ka jingkynshew kaba leit sha ka koit ka khiah, ka jingpynïasoh surok, ka jingpynmih bording na ki bor mariang, ka pule puthi bad ki jingtei ha ki shnong.
Kat kum ka kyrwoh ba ka pynlait, ka song pisa, kaba la mang hapoh ka Scheme of NEC (SoNEC) hapdeng u bnai Jymmang-Jylliew 2026, ka thmu ban pyntyllun sted ïa ka roi ka par kaba kynthup lang ïa baroh ha kylleng ka Jylla.
Napdeng ki project kiba kongsan ka dei ka jingpyndait ïa ka 1.5 Tesla MRI System ha Tura Civil Hospital, ka sienjam kaba la khmih lynti ban pynjanai shi katdei eh ïa ka rukom ai jingsumar sha ki nongpang ha ri-lum Garo bad ki jaka kiba marjan.
Ka NEC kala kyrshan ïa ka jingshna ïa ki jingtei ha Shillong Polytechnic bad ka Training-cum Resource Centre bala pynshna da ka NERCORMS ban pynkhlaiñ ïa ka Technical Education bad ki jingwanrah ïa ki buit treikam ba thymmai.
Ban pynneh pynsah ïa ka riti dustur ba hiar pateng ka Jylla, la ai jingïarap song pisa na ka bynta ka Seng Khasi Cultural Complex bad ka Seinraij Jowai Community Hall, katba ka Iewduh-ka Iew tynrai kaba rim duh hapoh ka thaiñ Shatei Lam Mihngi kan ïoh ïa ka jingshna pynbha ïa ki dukan ki ban pynmyntoi ïa ki nongkhaïi, ki nongrep bad ki nongthied nongpet.
Ha ka kam pynmih bording, ka Council ka la bei tyngka ïa ka sorjamin bad ka jingtohkit na ka bynta ka Mawblei, Myntdu Leshka Stage-II bad Selim hydroelectric projects, ka ban buh nongrim ïa ka jingpynmih bording kaba khuid hapoh ka Jylla ha ki snem ban dang wan.
Ka NEC ka la pyntip ruh ba la pyndep ban shna pynbha ïa ka surok Shillong-Umroi Airport project ha u bnai Jylliew, kaba shim ïa ka kum ka jingïarap kaba khraw na ka bynta ka jingpynïasoh ïa ka kad, ka kam jngohkai bad ka khaïi ka pateng.
