Shillong, Naitung 15: Ki paidbah ba ïaid ba ïeng ha ka thaiñ Khyndai Lad ha ka step Sngi Balang, ki la her syrngiew lut namar ba ka don ka pla bad ka Trolley (synduk) ba shu ieh ha ka jaka ïeng ki kali arshaka kaba don ha syndah ka OB Shopping Mall.
Kane ka pla ka dei ka rong jyrngam bad ka trolley ka dei ka rong ïong. ïa kine ki pla bad synduk la lap ha ka por 11:30 baje eiei.
Ki paidbah kiba ïohi ïa kine ki pla ba shu ieh ha katei ka jaka bad ba ym don ba kam trai, ki la pyntip mar mar sha ki Pulit Traffic kiba don ha Khyndailad ba kin leh ïa kaba donkam.
Ki Pulit mar kumta hi kila ker kut ïa ka thain Khyndailad haba mana ruh ïa ki kali bad ki briew ba kim dei ban rung sha kane ka jaka.
Tang hadien katto katne por hashuwa ban wan poi ki Pulit Bomb Squad, uwei u briew uba mih na MUDA Complex ula kam trai bad shimti ïa kine ki pla.
Ki Pulit kila pynlong ia ka jingtohkit kaba bniah hashuwa ba kin pynlait noh ïa ka jingkhang dam ïa ka surok.
