Da kawei ka sur rai ki Kynhun treimon sngewbha ban ïarap pynkhiah ïa kiba la ngop ha u drok

Shillong, Naitung 15 : Ki kynhun bapher bapher ha Meghalaya ki la mynjur ban ïatreilang ha ka ban pynkhlaiñ ïa ka jingïoh jingpyngkhiah jong kito kiba kyrni ha ka jingdih droks bad ban ïarap pynrung biang ïa ki briew kiba ngop ha u droks sha ka imlang sahlang.
Ka Care for India Reintegration project, ha ryngkat ka jingïatreilang bad ka DREAM Mission, kila pynlong ïa ka jingïasyllok ha ka Lah Sngi U Blei kaba la ai kyrteng “Ki jingshemphang shaphang ka jingdih buaid: Ka jingpynkhlaiñ biang ïa ka jingïalang.”
Ki nongmihkhmat na palat 20 tylli ki Seng Treimon sngewbha, ki kynhhun Niam, ki Rahabilitaton Centre bad ki Tnad Sorkar ki la wan ïashim bynta.
Ki jingïakren kala phaikhmat eh sha ki jingduna ha ka jingshimkhia ban khmih lang hadien ba dep ki jingai jingsumar, ka jingphah sumar sha ki jaka ai jingsumar (referral), ka jingkyrshan ha ka liang ka kamai kajih. Ki Nongkren ki kynthup ïa ka Dr Jasmine Mary Lyngdoh, Bah Francis Kharshiing, bad Rev EC Marwein kiba la ban jur ïa ka jingdonkam ban pynkhlaiñ ïa ka jingïatrei lang khnang ba kiba la ngop ha u drok kin nym duh ïa ka jingkyrshan hadien ba kila pyndep ïa ki jingshah sumar.
Kum ka jingmih, ki nongïashim bynta ki la rai ban thaw ïa ka Joint Forum ban pynkhlaiñ ïa ka jingïatrei lang hapdeng ki kynhun bapher bapher.
Ka Care For India kan pynïaid ïa ka forum na ka bynta shisnem, bad ïa ka jingïalang ba bud yn sa pynlong da ka New Hope De-addiction Centre ha u bnai Risaw.
U Bob Jacob jong ka Care for India ula ong ba ka jingkhiah ka dei ban ïoh ïa ka jingkyrshan da ka imlang sahlang ban pynthikna ïa ka burom bad ka jingthmu na ka bynta kito kiba tei pat ïa la ka jingim.