Nongstoiñ, Naitung 13 : Ka jingpynbha bad moramot ïa ki surok ha poh sor Nongstoiñ ka la ïaid shait shait hynrei kaba sngewsih ka long ba katei ka jingmoramot ka la shu long kumba ïaleh khun jakai ki khynnah rit namar katba ka jingmoramot ka dang iaid sshakhmat ka bynta ba kham shadien ka la jot bad pra. Ka long ruh kaba ithamula ban peit ba ïa ka rong ba moramot ïa kitei ki surok la shu khleh da ka rong ha u shyiap rew sa theh ha surok bad tylliat da ka roller ba kan dambit malu mala . Nalor kata tang mar shu hap u slap ka surok ka la pei thliew ym ithuh ithaw shuh. Ha kaba ïadei bad ka jingmoramot ïa ki surok ha ka sor Nongstoiñ ki paitbah ki la kynthoh jur ïa u kontraktor ha kaba ki la ong ba ki surok kiba utei u juh u kontraktor u dang shu dep moramot ha u snem ba la dep ki la pra lut bad kim shah slem satia. Ha kajuh ka por ki la ong ba ka jingtrei torti jong utei u kontraktor ka pynishai kdar ba u shu trei tangdep tang ban ïoh ïa ka pisa.
Ha kaba ïadei bad ka jingtrei torti ïa baroh ki surok ha sor Nongstoiñ la ïoh jingtip ba ki la don ki kynhun kiba la leit ban ujor sha ka tnad PWD bad la ïoh jingtip ruh ban a ka liang ka tnad PWD ka la pynsageh noh shuwa ïa ka jingmoramot ïa kitei ki surok. Na ka liang ki paitbah ka sor Nongstoiñ ki la kyntu jur ïa ka tnad PWD ba ka dei ban bthah ïa ki SA bad ki Overseer ba ki dei ban da leit peit man ka sngi ïa ka rukom trei namar bun sien ki kontraktor ki ju leh mon bad trei tangdep ïa ki surok tang na ka bynta ban ïoh nong kham bun. Ha kajuh ka por ki la ong ba kino kino ki kontraktor ki dei ban da bishar bniah ïki jingtrei shuwa ba kin thep ïa ki tender bad lada ki ithuh ba ka jingtrei ka duh nong kim dei satia ban shu rhah kam namar lada ka jingtrei torti ka pynïoh nong ïa ki ka wan rah pat ïa ka jingduh nong kaba khraw ïa ki paitbah.
