Khlem pynslem kem noh ki pulit ïa ki 6 ngut ba pynjulor ïa ka homestay ha Risa Colony

Shillong, Jylliew 13 : Ki Pulit ka East Khasi Hills khlem pynslem ki la kem noh ïa ki briew kiba la shah kynnoh ba ki donkti ha ka jingbyrngem bad pynjulor ïa ka Oak Homestay ha Risa Colony.
Na ka liang u Superintendent of Police (SP) ka East Khasi Hills, Vivek Syiem, u la ïathuh ba ki Pulit ki la ïoh pdiang ïa ka jingujor ha ka 11 tarik Naitung ba ar ngut ki briew ki la byrngem ïa ki nongtrei bad pynjulor ïa katei ka homestay, hynrei ki la mih noh khlem siew ïa ka jingpynjulor.
U la ong ba hadien ka jingujor, la register ar tylli ki case bad la sdang mardor ïa ka jingtohkit. Da ka jingïatreilang bad ki Pulit na Kokrajhar, Alipurduar bad Sapatgram, la lah ban bat ïa kiba shah kynnoh ha ka por kumba 4:45 janmiet.
Kiba la shah kem ki long u Vikas Singh, u Avinash Singh bad u Akand Pratap Singh, ryngkat bad lai ngut ki khynnah kiba dang kumba 17 snem ka rta.
U SP u la ong ba hadien ba ki Pulit ka Alipurduar ki la bat ïa ki, ka kynhun Pulit na Shillong ka la leit shaw bad kem ïa ki, bad hadien la wanrah ïa ki hakhmat ka Ïingbishar jong u Chief Judicial Magistrate (CGM) ha Alipurduar.
Hynrei namar ba ki kyndon aiñ kiba la pynngat pyrshah ïa ki ki dei kiba jingpynshitom ka bym palat hynñiew snem, la pyllait noh ïa ki da ka jamin. Katba ïa ki lai ngut ki khynnah la wanrah hakhmat ka Juvenile Justice Board (JJB) katkum ki kyndon jong ka aiñ.
U la iathuh ba watla kiba shah kynnoh ki la ïoh jamin, hynrei u SP u la banjur ba ka jingtohkit ka dang ïaid shakhmat, bad ki Pulit kin pyrshang ban pyndep kloi ïa ka jingpyngnat kyndon.