Ka Sorkar Pdeng ban pynlong ïa ki National Conference ha kylleng ki Jylla: Dr.Jitendra

Shillong, Naitung 13: Ka National Conference ba arsngi halor ka NEXTGEN Administrative & E-Gov Reforms, bala pynlong da ka Department of Administrative Reforms and Public Grievances (DARPG), hapoh ka Ministry of Personnel, Public Grievances and Pensions, Government of India ha ka jingiatreilang bad ka Sorkar Meghalaya, la plie mynta ka sngi da u Dr Jitendra Singh, Myntri Khynnah ka Ministry of Science and Technology and Ministry of Earth Sciences & Minister of State, Prime Minister’s Office, Ministry of Personnel, Public Grievances and Pensions, Department of Atomic Energy; bad Department of Space uba la pynshongkun ïa ka jingialang plie kum u Kongsan.
Kiba ïadonlang ki long u Myntri Rangbah ka Jylla Conrad K Sangma, Chief Secretary ka Meghalaya Dr Shakil Ahammad, ki heh Ophisar n aka DARPG, bad ka Tnad Personnel ka Sorkar Meghalaya.
Haba ai jingkren, u Kongsan, Dr Jitendra Singh ula kren halor ka jingpyrshang jong ka Sorkar Pdeng ban pynlong ïa ki National Conference ha kylleng ki Jylla khnang ban wanrah ia ka jingiadei ba iajan bad ki nongialam na ki Jylla ban lah pynbha ia ka synshar khadar.”Ka jingpawnam jong kine ki National Conference kala paw shai da ka jingkwah bala pynpaw da ki ba bun ki Ophisar ban wan iashimbynta wat hapdeng ka jingbun kam jong ki” ula ong.
U la pynpaw ruh ïa ki lad ki lynti kiba kine ki Conference ki ai da kaba ong, “Ngi ïoh jinghikai na ki rukom treikam kiba bha tam jong uwei pa uwei bad ka Meghalaya ka la pyni nuksa da ka New Shillong Administrative City bad kane ka jingmut ryngkat bad ka Digital Model jong ka synshar khadar kaba la wad ban thaw hangne ka dei kaei kaei kaba ym shym la ïohi lypa ha ki shiphew snem mynshwa.”
U la pyntip ruh ba ka DARPG ka la ioh pdiang haduh 25 lak tylli ki jingujor ba la rejistar bad bynrap, “Wat hapdeng ka jingbun ki jingujor ngi shimkhia ïa ki, long kiba kloi ban leh eiei bad ka dei ruh kaba la pynlong da ka AI.”
“U la pyntip shuh shuh ba dang shen la wanrah ïa ka chatbot ha ki 22 tylli ki ktien ki ban sa pynïar shuh shuh ha kiwei pat ki ktien bad ka Digital Life Certificate kaba la pynshisha ba ka long ka khana jong ka jingjop kaba khraw bad ka jingwnrah ïa ka kor ban pynithuh lyngba ka dur khmat ki long ki jingpynkylla kiba kongsan bha ha ka liang ka synshar khadar.
U la kdew ruh ïa ka Swachhta Campaign kaba la sdang ha u snem 2021 kaba la pynmih shibun ka jingmih ha ka pisa tyngka lyngba ka jingpynduh ïa ki jaboh jabaiñ.
U Myntri Rangbah ka Jylla, Conrad K Sangma, ha ka jingkren, u la ong ba ka National Conference ka la ban jur ïa ka jingdonkam ban don ki jingkylla ha ka rukom pyniaid kam khnang ban kyntiew ïa ka jingtreikam bad ka jingshakri paidbah.U la pynpaw ïa ka jingdonkam ban jop ïa ki jingeh ban wanrah ïa ka jingkylla bad u la kyrshan ia ki jingpynbha kiba rit, kiba nang kiew.
Haba kren shaphang ki jingeh ha ka E-Governance bad ka Administrative Reforms u la ïakren halor ka jingpyrshah ïa ka jingkylla bad ka jingtieng ban tyrwa ïa ki jingmut kiba thymmai namar ki jingsngewthuh bakla kiba lah ban mih.
U la ïasam ïa ki nuksa jong ka CM Connect, ka prokram jong ka sorkar jylla kaba pyndonkam ïa ka teknoloji bad ka jingïakren markhmat bad ki paidbah ban leh eiei halor ki jingujor bad ki jingeh. U la ban jur ruh ia ka jingdonkam ban ioh ia ka jingai jingmut jong ki paidbah na ki nongtrei hapoh jong u kiba ju iakynduh markhmat bad ki paidbah.
“Ka thong ba kongsan ka dei ban long ka jingai jingshakri ia ki paidbah bad ban wanrah ia ka jingkylla ha ka jingim jong ki,” u la ong. U la ïathuh khana ruh shaphang ka Cabinet Retreat ka jylla ha kaba baroh ki tnad ki wanrah ia ki plan bad ki buit treikam nalor ki jingeh kiba mih na ka jingpynshlur ia ka jingiatreilang hapdeng ki Tnad.
Haba pynkut, u Myntri Rangbah ka Jylla, u la ïasam shaphang ka jingdonkam ban bat ïa ka jingmut jingpyrkhat kaba bha bad ka jingkwah ban leh bha na ka bynta ki paidbah. U la ban jur ruh ia ka jingdonkam ban iawan lang ban iasam ia ki jingjop bad ki jingduhnong bad ban ai mynsiem mar kylliang.
Ka Plenary Session ha kane ka sngi kala sdang da ka jingai jingbatai ia ki rukom treikam kiba bha tam jong ka Jylla Meghalaya, ka jingai jingkren da ki nongioh khusnam na u Myntri Rangbah Duh ka ri bad ka jingai jingkren da ka Ministry of DoNER.