Shillong, Naitung 13 :Ki Pulit ka East Khasi Hills ki la pynmih ïa ka lookout notice ha ka ri baroh kawei, ryngkat bad ka jylla Mizoram, ban wad bad kem ïa uba shah kynnoh ha ka kam leh be-ijot kaba la rejistar ha Laitumkhrah Police Station.
Haba pyntip ba ka jingwad ïa une uba shah kynnoh ka dang ïaid shakhmat na ka liang Superintendent of Police (SP) ka East Khasi Hills, Vivek Syiem, u la ong ba la thaw ïa ka kynhun ba kyrpang ban wad ïa uba shah kynnoh bad ki Pulit ki dang ïatreilang bad ki jylla bapher bapher ban lap ïa u.
“Ngi la dep phah ïa ka lookout notice sha Mizoram bad mynta la pynmih ruh ïa ka lookout notice ha ka ri baroh kawei. Ka kynhun ba kyrpang ka dang trei shitom ban wad bad kem ïa uba shah kynnoh,” la ong u SP.
U la ïathuh ba la dep ban shim ïa ka jingkren jong ka lanot bad ha ka jingtohkit la ïoh jingtip ba lah ban don sa kiwei pat kiba la shah ktah.
“Katkum ka jingtohkit kaba dang ïaid, ngi la ïoh jingtip ba lah ban don sa kiwei pat ki lanot. Yn sa khot bad tohkit ruh ïa ki katba ka jingtohkit ka nang ïaid shakhmat,” u la ong.
U SP u la ïathuh ruh ba ki Pulit ki la ïakren lyngba ka phone bad katto katne ki briew kiba lah ban don jingïadei bad kane ka case, bad la kyntu ïa ki ban wan shakhmat ban ai ïa ki jingkren jong ki bad ban register ïa ka FIR.
“Haduh mynta, ngi la ïakren tang lyngba ka phone bad katto katne ki briew. Mynta la khot ïa ki ban wan sha Police Station ban ai ïa ki jingujor (statement) jong ki. Kane ka bynta ka dang ïaid,” u la ong.
Halor ki jingkynnoh kiba saphriang ha social media, u SP u la ong ba ki Pulit kin ym shim ïa ki kum ki sakhi ba tikna hynrei kin bishar bad pynshisha ïa ka jingshisha jong ki shuwa ban shim kano kano ka sienjam.
“Ki jingthoh ha social media kim dei ki sakhi ba lah ban shaniah mardor. Tang hadien ba kiba shah ktah ki wan shakhmat, ai ïa ki jingkren jong ki bad ki Pulit ki pyndep ïa ka jingtohkit, yn sa lah ban pynthikna ïa ka jingshisha jong ki jingkynnoh,” u la ong.
U SP u la pynpaw ruh ba ki khubor ba ong ba uba shah kynnoh u la phet sha Aizawl kim pat long kiba shisha. U la ïathuh ba ki Pulit ka Aizawl ki la dep talasi ïa ka ïing jong u, hynrei kim shym la lap ïa u.
“Nga la ïakren bad u SP ka Aizawl bad ki la dep leit talasi ïa ka ïing jong uba shah kynnoh. Hynrei um don satia hangta,” u la ong.
U la ban jur ba ka kam kaba hakhmat eh jong ki Pulit mynta ka long ban lap bad kem ïa uba shah kynnoh. Hadien ba la kem ïa u bad la lum lut ïa ki sakhi bad ki sabut kiba donkam ban pynstet ka jingbishar katkum ki kyndon jong ka aiñ.
