Lada ym treikam ka kam dewïong kin mih madan bad pynkhih win ïa ka sorkar

Khliehriat naitung 12: Ha ka jingialang paidbah ba la khot pynlong da ka Jaiñtia Coal Miner and Dealer Association mynta ka sngi ha Khliehriat West, ki nongialam jong ki ar tylli ki sengbhalang ba kynthup u President Jaiñtia National Council, bah Sambormi Lyngdoh bad u President jong ka Meghalaya People United Front East Jaiñtia Hills District, bah Kyrshan Blah, ki la mih rynsan bad ai jingkren bad byrngem ba lada ka sorkar kam leh eiei ïa ka kam dewïong, kin mih madan ban pynkhih win ïa ka sorkar.
U bah Kyrshan Blah u la ong ba sa katno ngin iaishah sa katno sien ngin sngap ïa ki jingialang, u kyntu ia ka seng dewiong ban buh por ne deadline ïa ka sorkar ban ioh ban pyllait ïa u dewïong “ngi la mad jingeh imat ngin hap mih paidbah sha surok ban khanglad noh ïa ka jingwan u dewïong na bar namar lada duh dewïong ki company te hangta ki company kin iakren bad ka sorkar ban plie noh ïa u dewiyong bad katba dang wan poi u dewïong na bar ki company kin nym kynduh jingeh bad kin nym kren eiei ha ka sorkar.
“Sa katno ngin iaishah namar mynta ngi la poi ka um ha ryndang, ha kaba ym don kam don jam shuh, ngi la shem jynjar haduh katta katta” pynpaw u bah Kyrshan Blah bad kyntu ïa u MLA bah Kyrmen Shylla ban sngewbha ban shimkhia lem.
U bah Kyrshan Blah, u la ai ka jingiaroh ïa ka jingtrei shitom ka seng dewïong ka JCMDA kaba dang iai trei haduh mynta na ka bynta ban pynioh biang ïa ka lad ban tih dewïong, u la ong ruh ba ki paidbah kiba wan sha kane ka jingialang ki dei kiba mad jingeh na ka daw ba khang dewïong
Kumjuh ruh u bah Sambormi Lyngdoh u la ong ” Ka jingiatylli ka long ka bor, ka sur jong ngi ka la poi shaduh ki shkor jong ka sorkar India, ka jingiatylli ka don ruh ïa ka bor kaba khlaiñ ban pynkhih win ïa ka sorkar, wat ai ba kane ka jingiatylli kan duh kan dam bad lada kane ka sorkar ka thok biang ia ngi sa shisien bad lada ka sorkar ka pynduh jingshaniah ia ngi, te ngin sa ia jubab ia ka sorkar, namar ki paidbah ki don ka bor ban pynieng bad pynhiar ia ka bor synshar, lada ka sorkar ka long kum u dieng pyut sa shisien hap ban ïa mih madan bad pynkhih win, wat duh jingkyrmen paidbah namar wat ka sorkar India ka kwah hi ban plie dewïong namar ka sorkar ruh ka ioh ïa ki khajna na u dewiong bad lada ka sorkar ka dang kylla ktien ngi long kiba la kloi ban iakhun bad ka sorkar na ka bynta ban pynneh pynsah ïa ka hok jong ki paidbah”
U bah Sambormi Lyngdoh, u la ong ruh ba wat u myntrirangbah ka ri, u N.Modi ruh u la tip ïa ka jingeh jingjynjar ki paidbah ka East Jaintia Hills na ka daw ba khang dewiong, u la ong ruh ba ym dei ban duh jingkyrmen kan sa don ka lad ban tih dewiong ka rit ba rit kaba hapoh 5 hactar ka jingheh ka jaka, namar lada tam ia 5 hectar ym lah shuh ban khot ka Small Scale Underground Mining bad kane kan iarap ïa ki nongtrei dewïong kiba rit ba ria bad halor kane donkam ban shna ïa ki aiñ ki kyndon ba ka kam dewïong kan neh pateng la pateng bad ki aiñ ki kyndon kin iarap ruh ban iada ia ka mariang, ki um k, ki wah bad iada ruh jingim briew.
U nongialam ka JNC, bah Sambormi Lyngdoh, u kyntu ruh ïa ki paidbah ba kin long kiba iaishah namar ban shna ia ka policy, ban shna ïa ki aiñ ki kyndon kam dei kaba suk bad ka lah ban sim por, ua la ai nuksa ruh ba wat tang ban shna ia ki kot kali ruh ka shim por da ki bnai, te kumta donkam ban iaishah ha ka jingialam ka JCMDA.