Nongstoiñ, Naitung 12: “Halor ka jingmih khubor ha kine ki sngi ba ka la don ka jingbym kwah shuh ka kur Syiemïong ïa u bah Kawangbor Syiemïong ban long Syiem ha ka hima Nobosohphoh, ka long kaba khlem nongrim namar kum ka ophis u Syiem ka Hima Nobosohphoh Syiemship naduh ki myntri bad ki Lyngdoh jong ka Hima, kim dei ba ki shu kyrshan khlem ka nongrim ïa u bah Kawangbor Syiemïong ban shimti ïa ka kam Syiem. Hynrei, ka dei ka hok jong u ban synshar bad u la synshar naduh u snem 2008”, ong u bah Bistoran Ïawphñiaw Secretary ka Hima Nobosohphoh Syiemship ha ka jingïakren bad u nongthoh khubor.
U bah Bistoran u la ong, “Lah 18 snem kynthih u bah Kawangbor Syiemïong u la long Syiem ym shym la don ba ujor ei ei. Hynrei balei pat kyndit kynsan tang mynta u snem 2026, la don kiba ujor bad kiba la kynnoh ruh ba um shym la ai pisa sha ki kur. Ñiuma, ïa ka kam pisa ki kur Syiemïong na ka lïang ka Hima kam lah ban tuklar ei ei, hynrei ban ap khmih lynti ba u Syiem ka Hima Nobosohphoh un ai sha ki kur Syiemïong te ka long kaba bakla. Namar ka Hima kam dei eiei ha kaba wat ka bai kot bai sla ruh la hap ban pynlut na pla”, ong u bah Bistoran.
Shuh shuh u la ong ruh, “Phi la ïohi ba u bah Ferdinace Syiemïong Acting Syiem barim ka Nobosohphoh Syiemship, u la kren lyngba ki lad pathai khubor kaba la mih myn ha ka 8 tarik u Naitung 2026, kaba la pyni ruh ba u la kam ba um don jingtip ei ei shaphang ka jingshah pynhiar khet ïa u. Nangta ka jingshimti biang u bah Kawangbor Syiemïong kum u Syiem bad u la kam ruh da kaba u la kynnoh ba u bah Kawangbor Syiemïong Syiem ka Hima Nobosohphoh Syiemship um shym la pyntip ei ei sha u, na ka liang ka ophis u Syiem ka Hima Nobosohphoh Syiemship, ka pynshai paidbah ba ka jingkam u Acting Syiem barim ka long kaba khlem nongrim. Namar na ka liang u Syiem kata u bah Kawangbor Syiemïong u la dep ai da ka jingthoh naduh ka 29 tarik u Jylliew 2026”, u la ong biang.
Haba ïadei bad kane na ka liang u bah Bistoran Ïawphñiaw u la pynshisha ruh da ki jingthoh kaba la ai copy sha u bah Ferdinace Syiemïong Acting Syiem barim ka Nobosohphoh. Ka don ruh wat ka sur jingïakren kaba la record kaba la pynsngewthuh shai ba wat ïa u shabi ruh la dep ban ïakut ban leit aiti sha u bah Kawangbor Syiemïong. Hynrei na ka liang jong u bah Ferdinace um shym la leh kumba la ïakut.
U bah Bistoran Ïawphñiaw Secretary ka Hima Nobosohphoh u la ong shuh shuh ba ka jingthoh kaba la poi sha u bah Ferdinace Syiemïong, shaphang ka jingbthah ka KHADC ba un ai ïa ki kyrteng jong ki shnong hapoh ka Hima Nobosohphoh, ka dei tang ka jingbakla thoh ïa ka Address na ka liang ka Council hynrei kam don ei ei.
Ha kane ka jingpynshai ha ha ki lad pathai khubor ha ka sngi saitjaiñ ha Nongstoiñ da u bah Bistoran Ïawphñiaw Secretary ka Hima Nobosohphoh Syiemship, la ïadonlang ruh u bah Kawangbor Syiemïong Syiem ka Hima Nobosohphoh Syiemship, bad kiwei kiwei ki Myntri bad ki Lyngdoh ka Hima Nobosohphoh Syiemship.
