Shillong, Naitung 11 : Kumba 80 persen na ki jaboh ba la lum la bun snem ha ka jaka theh niut kaba don ha Marten la dep ban weng bad pynkhuid, bad ka projek ban pynkhuid ïa katei ka jaka ka la jan poi sha kaba kut, ong u Symbud Myntri Rangbah ba khmih ïa ka tnat Urban Affairs, u Sniawbhalang Dhar.
U Symbud Myntri Rangbah u la pyntip ruh ba ka Sorkar ka dang trei shitom ban pynkhuid ïa ki jaboh kiba dang sah ha ka jaka bret ñiut barim ha Marten katba ka dang ap ïa ka jaka bret niut bathymmai na ka bynta ka nongbah Shillong.
“Ki jaboh kiba sah ha ka jaka bret ñiut barim ha Marten ki la jan dep ban pynkhuid. Haduh mynta ngi la lah ban weng palat 2.5 lak ton ki jaboh jabain kiba la lang slem,” ong u Bah Sniawbhalang Dhar haba kren sha ki lad pathai khubor.
U la pynpaw ruh ïa ka jingkyrmen ba hapoh ki khyndiat snem ban wan, yn lah ban pynbha bad pynkylla pura ïa katei ka jaka.
“Hadien katto katne snem, kane ka jaka kan ym long shuh kumba ka long mynta. Kan sa kylla dur lut,” u la ong.
Katkum ka jingïathuh jong u Symbud Myntri Rangbah, haduh mynta la dep ban pynkhuid bad weng kumba 80 persen na ki jaboh kiba lum ha Marten.
“Katba ngi dang ap ïa ka jaka bret niut kaba thymmai, kumba 80 persen na ki jaboh barim ha ka Marten landfill la dep ban weng noh,” u la bynrap shuh shuh.
