Khyrwit u lapbah kylleng ki bynta ka jylla, shah ktah palat 32 tylli ki shnong

Shillong, Naitung 11: U Myntri Rangbah ka Jylla, u Conrad K. Sangma, ha ka sngi Saitjaiñ u la lum ïa ka jingïalang pyrkhat kam bad ki Deputy Commissioner lyngba ka video conference ban peit ïa ka jingktah jong u lapbah uba dang bteng ban ther ha kylleng ki bynta jong ka jylla bad ruh ban kyntu ïa ki bor distrik ba ki dei ban long kiba la pynkhreh lypa na ka bynta ban pynstet ïa ki bor ai jingïarap lada jia ba ki bor ka mariang ki wan syllad kynsan.
Katkum ka jingïathuh jong ka Meghalaya State Disaster Management Authority (MSDMA), haduh 32 tylli ki shnong ha kylleng ka jylla ki la shah ktah ha kane ka samoi slap naduh ka taïew banyngkong jong u Naitung.
Kine ki jingjia, kiba bun na ki distrik jong ka Garo Hills bad ki bynta jong ka Khasi Hills, ki kynthup ïa ka jingkhyllem khyndew, ka jingshlei um kynsan bad ka jingshlei um ha ki katto katne ki jaka. Watla katta, ym pat shym la don kano kano ka jingduh ei ïa ki mynsiem briew ha kine ki jingjia.
Hadien ba ka India Meteorological Department (IMD) ka la buh ïa ka Meghalaya hapoh ka Orange Alert bad ka la maham ba un dang ïai don u slap ha kylleng ka jylla ryngkat bad u slap ba jur haduh uba jur tam ha ki katto katne ki jaka haduh kumba 15 tarik u Naitung, kumta na ka liang u Myntri Rangbah u la bthah ïa ki bor synshar distrik ban long kiba husiar bha.
U Sangma u la ban jur ïa ka jingdonkam ban don ka jingïatreilang kaba jan hapdeng ki bor synshar distrik, ki kynhun ai jingïarap ha ki Block bad ki tnad sorkar kiba dei peit, khnang ba kino kino ki jingjia kin ïoh jingïarap mardor.
U la bthah ruh ba ki nongtrei kiba don ha ki jaka bad ki lad ai jingïarap kin long kiba la pynkhreh ban leh mar mar haba don kano kano ka jingjia.
Ha kajuh ka por u Myntri Rangbah u la bthah ba dei ban pynbha noh shwa ïa ki surok kiba la shah ktah na u slap khnang ban pynïaid biang ïa ka leit ka wan.
U la bishar bniah ruh ïa ka jingtwa khyndew ha ka surok ba poi sha ka Mineng Bailey Bridge hajan Gasuapara ha South Garo Hills, ha kaba la shah tang ki kali kiba kham rit ban ïaid kum ka lad jingïada.
La ïathuh ba na ka bynta shipor la pyndonkam noh da kawei pat ka lynti ïaid.
U Sangma u la bthah ba ka jingjurip bad ka jingpynbha shipor ïa katei ka jaka dei ban pyndep kloi katba lah.
Shuh shuh, u la bthah ba ka jingïarap bad jingïoh jingïarap dei ban poi khlem jingpyn slem sha ki longïing kiba la shah ktah, ba ki marbam bad ki jingïarap ba kongsan kin ïai bteng khlem jingthut, bad ba ki bor distrik kin ïai peitngor ïa ka jinglong jingman da kaba ai kaiphod man ka por sha ka Sorkar Jylla.
La kyrpad ruh ïa ki paidbah ban long kiba phikir da kaba kiar na ki surok kiba don ka jingma ban khyllem khyndew bad na ki wah kiba shlei um, ban bud ïa ki jingbthah jong ki bor shnong bad ki bor synshar, bad ban pynsangeh shwa ïa ki jingleit bym donkam kyrkieh ha ki surok lum haba jur u slap. La ai jingmaham ruh ban long kiba phikir na ka jingma jong u pyrthat ha ki por ba jur ka eriong.