Leh burom bad sngap jar ka KSU halor ka jingkhlad kynsan jong u samla Melajied Khongbuh

By Mawphor Editor On Jul 12, 2026

Shillong, Naitung 11: Ka Khasi Students’ Union (KSU) ha baroh kawei ka Bri u Hynñiewtrep bad ha kylleng ka ri ba ka seng ka don ki shnat treikam, mynta ka sngi ka la pynlong ïa ka jingsngapjar ba shi minit bad ka Jingpynhiar shiteng ïa ka lama ka Seng ha man ki Ophis treikam jong ka.
La leh ïa kane kum ka dak ka jingpynpaw ïa ka jingsngewlem bad ka jingsngewburom kaba khraw halor ka jingkhlad kynsan u Samla Melajied Khongbuh u Assistant Organising Secretary ka Central Excutive Council. La pynlong ruh ïa ka jingduwai na ka bynta ka mynsiem jong u Samla Melajied ban kan poi suk sha Dwar U Blei.
La ong ba ha kane ka sngi, ka seng ka la pynpaw ruh ïa ki kyntien sngewlem sha ki bahaïing- hasem, ki Paralok baroh jong u Samla Melajied uba ki la duh noh ïa la u ba ieid ba thoiñ.
Ka seng ka pynpaw ruh ka jingsngew lem sha ka shnong kaba la duh ïa la u para shnong uba la pyrshang ïa kaba bha tam kaba u lah ban pyndep ïa la ka deiti kum u nongshong shnong.
Ka KSU ka la kynmaw ieid bad pynpaw ïa u synniang u bynhei ba khraw uba une u samla u la synniang sha ka jaidbynriew lyngba ka jingshakri ka jong u met bad mynsiem ha ka seng.
Ka KSU ka la pynpaw ba ka sngewkit ram shi katdei halor kane ka jingkhlad kynsan une u samla ha ka por kaba lyngkot eh ba u dang shakri ïa ka ri bad ka jaidbynriew.
Hynrei, ka seng ka la pynpaw pat ba wat la ka rta u samla Melajied ka long kaba lyngkot, ki kam bad ka jingshakri jong u pat ki long kiba jlan bad kiba lah ban kynmaw kynpham ki ha ka histori ka seng bad ka jaidbynriew.
Ka seng ka sngew kitram ruh ïa ki kmie ki kpa bad baroh kiba ha ïing kiba la aiti mon sngewbha ïa la u khun ba un shakri ïa ka jaidbynriew ha pdeng ka khia ka shon bad ki jingtyrha ha ba bun rukom.
Ka seng, wat ha pdeng ka jingsngew sahnud ïa ka jingkhlad noh u dkhot bad u nongïalam ka seng hynrei kum ka seng ngi ngeit ba na lyndet ki lyoh na ïing u blei u samla Melajied un ïai synran ïa ka seng bad ka jaidbynriew ha man ka khep ba khyllipmat jong ka jingïaleh.