Dadenggre, Naitung 11: Da ka jingsngewsih namar ka jingthut jong ki mobile bad internet ha ka thaiñ Dadenggre, u MLA ka thaiñ u Rupa M. Marak u la ai por shi-bnai ïa ki nongpynïaid ïa ki telecom ban pynbha ïa ka jingïadei, da kaba maham ba ka jingbym biang ka jingpynïaid network ka pynthut ïa ka synshar khadar, ka pule puthi bad ki jingshakri paidbah ba kongsan.
Kane ka jingkut jingmut ka la wan ha ka high-level coordination meeting ha ka ophis jong u Sub-Divisional Officer (Civil), Dadenggre, ha kaba ki ophisar, ki nongsynshar shnong, ki seng trei mon sngewbha bad ki nongpynïaid telecom ki la bishar bniah ïa ki jingeh ha ka thaiñ.Ia kane ka jingialang la pyniaid da u Marak bad la ïadon lang u SDO (Civil) In-Charge u Rajkumar Hajong.Ki nongmihkhmat jong ka BSNL, ka Reliance Jio bad ka Vodafone Idea (Vi) ki la don lang, katba ka Airtel kam shym la wan.
Haba pynpaw ïa ka jingsngewkhia halor ka jingsniew jong ki jingshakri ka telecom, u Marak u la ong ba ka jingbym shanniah jong ka jingpyniasoh ka la pynslem ïa ka jingsiew bai bylla jong ka MGNREGA, ka la pynthut ïa ka jingpynpoi ïa ki jingshakri jong ka sorkar bad ka la ktah jur ïa ki samla pule kiba shaniah ha ka internet na ka bynta ka jingpule jong ki.
Da kaba khot ïa ka jinglong jingman kaba ym lah ban pdiang, u MLA u la bthah ïa ki nongpynïaid telecom ban shim ïa ki lad ki lynti ban pynbeit mardor bad ban pynthikna ïa ka jingbha kaba lah ban ïohi hapoh shi bnai.U la kren shai ruh ba baroh ki kompeni telecom, kynthup ïa ka Airtel, ki dei ban wan sha ka jingïalang bishar bniah ka ban wan bad ban ai ïa ka jinglong jingman halor ki sien jam ba la shim ban pynbha ïa ki jingshakri.
Ha kane ka jingiakynduh, ki heh jong ka Reliance Jio ki la pynshong nongrim ïa kane ka jingpynthut kaba ju jia man ka por namar ka jingpynlip bording man ka por bad ka jingshah ot ki fiber cable man ka por.Ki la pynthikna ha ka jingialang ba ka jingtrei ka dang ïaid shakhmat ban pynkhlain ïa ki jingtei jong ka network bad ban pynbha ïa baroh ar ki jingpyniasoh mobile bad internet ha kylleng ka thain.
Ka jingialang ka la kut da kaba ki heh bad ki ophisar ka telecom ki la mynjur ban iatreilang ban weng ïa ka jingeh ha ka jingpynïasoh bad ban ai ïa ki jingshakri ba kham bha ha ka jingpyniadei sha ki nongshong shnong jong ka Dadenggre.
