Shillong, Naitung 10: Ka National Highway Infrastructure Development Corporation (NHIDCL) kaba peit ïa ka jingshna ïa ka surok Shillong Dawki haduh mynta kam pat maramot ïa ka surok kaba la twa harum Laitlyngkot kam pat maramot haduh mynta wat la ka jingtwa ka la kot sha ka artaïew.
Kane ka jingleh ka la pynkyndit ba ïa ka surok kaba la dkut noh harum Laitlyngkot, kaba la ïaid sha ka shiteng bnai, hynrei ym pat ktah eiei wat la ha ka sngi ba twa la trei ban pynhap khyndew bad ki briew jong ka NHIDCL ki ong ba hapdeng lai saw sngi kin pyndep hynrei mynta la ar taïew kim pat leh eiei.
Haba ki nongthoh khubor kila leit sha katei ka jaka ha ka sngi Palei ka 9/7/2026 la ïohi ba ka jaka ka la kynjah slam slam khlem don briew khlem don nongtrei satia lait noh tang ka jingkhang da ka khyndew ïa katei ka jaka kaba don hajan ka surok ba dkut.
Ka jingdkut katei ka surok Shillong-Pynursla-Dawki ka la buh jingeh ïa ka leit ka wan jong ki paidbah ka thaiñ Pynursla bad mynta kila hap ban shu pyndonkam ban ïaid na surok khohruh khohram na Ïewmawiong, Umthli, Nongthymmai ban mih sha surok Bah Khrik ha Laitkynsew ban poi ha surokbah khnang ban ïaid kiar na katei ka jaka kaba dkut ka surok.
Ha ka jingïakren bad ki briew ka kompeni kaba pyntrei ïa kane ka surok, la ïathuh ba ki dang ap ban ïoh jingbit na ka bor ba dei peit kum ka NHIDCL. Ki la ong ba namar ba kim pat ïoh jingbit, kumta kim pat ktah eiei ban pynbha biang ïa katei ka jaka kaba la dkut ka surok.
La ïathuh ba hap ka donkam ban tih ïa u lum namar ban shu pyndap kala kham eh ba jrong ka riat haduh 300 metre bad kila ong ba kan shim por ban pyndep hapoh 3 bnai ban pynïasoh biang ïa ka surok kaba dkut.
