ïaroh u Myntri ba u Sohtrun napoh Meghalaya u dei uba thiang tam

New Delhi, Naitung 10: Ka Meghalaya Pineapple Festival kaba saw (4th Edition) ka la sdang mynta ka sngi ha Dilli Haat, New Delhi, da ka jingthmu ban pyninam bad pynpawnam ïa u sohtrun na Meghalaya, uba la ïoh jingïaroh ha kylleng ka ri India bad wat shabar ri ruh namar ka jingbang bad ka jingthiang jong u.
Na ka liang ki paidbah tang mar sien wan poi u sohtrun naka jylla kila boi bad tang shiphang u la lut noh haka jaka ba pynlong ïa katei ka tamasa kaba pynpaw ba u sohtrun naka jylla u dei shisha u ba don ka jingdawa wat shabar jylla bad ka jylla ka phah kumba 25 metric ton u Sohtrun bad kumba 250 ngut ki nongrep ha kane ka tamas aba 3 sngi.
La wan ban plie ïa kane ka tamasa da u Myntri ka sorkar pdeng uba peit ïa ka tnat Communications bad Development of North Eastern Region (DoNER), u Jyotiraditya Scindia, ha ka jingdonlang u Myntri Rangbah ka Meghalaya, u Conrad K. Sangma, u Commissioner & Secretary ka Sorkar Meghalaya u Vijay Kumar, ki nongrep bad bun ki ophisar ka jylla.
Haba ai jingkren, u Jyotiraditya Scindia u la ai jingïaroh ïa ka sorkar Meghalaya kaba la shim ïa kane ka sienjam ban pynpaw paidbah ïa ka jinglong kyrpang jong u sohtrun na Meghalaya bad ban plie lad ïaki nongrep ba kin ïoh ki ïew kiba heh. U la ong ba ka jingïoh jingïarap bad jingïoh nong na ki nongrep ka la kiew shibun haba nujor bad ki snem ba la dep.
U Myntri u la pynpaw ruh ba u Sohtrun na Meghalaya u dei uba thiang tam ha ka ri India. U la ong ba ka jylla ka la pawnam ruh ha ka jingpynmih ïa ki marrep kiba kordor kum u shynrai Lakadong, u sying bad u sohmrit bd kiwei kiwei kiba don ka jingdawa kaba jur ha ki ïew bad kane ka ai lad ïa ki nongrep ban kyntiew ïa ka jingïoh ka kot jong ki bad ka ïoh ka kot ka jylla hi baroh kawei.
U la ïaroh ruh ïa ki prokram jong ka sorkar Meghalaya kum ka M-LAMP Programme, CM Farm+ Programme, Meghalaya Organic Mission bad kiwei kiwei, da kaba ong ba palat 90,000 ngut ki nongrep ki la ïoh jingmyntoi na kine ki skhim. U la ong ba ka jingïatreilang hapdeng ka sorkar bad ki nongrep ka dei ka bynta kaba kongsan ban pynurlong ïa ka thong Viksit Bharat bad ban pynlong ïa ka thaiñ Shatei Lam Mihngi kum ka enjin jong ka roi ka par ka ri.
Ha kaba kut, u Jyotiraditya Scindia u la kyntu ïa ki nongrep ba kin nangtrei shitom bad pynheh ïa ka jingpynmih. U la ong ba ka Ministry of DoNER ryngkat bad kiwei pat ki tnat ka sorkar pdeng ka dang shim bun ki sienjam ban kyntiew ïa ki mar rep ba pawnam jong ka thaiñ, khamtam u shynrai Lakadong, khnang ba ki nongrep kin ym tang pynbun ïa ka jingpynmih hynrei kin ïoh ruh ïa ka dor kaba biang bad ka jingïoh nong kaba kham bha ha ki ïew.
Na ka liang u Myntri Rangbah ka jylla u Conrad K Sangma haba kren ha kane ka sngi u la ong ba kane ka tamasa sohtrun mynta u snem ka dei kaba kham heh haba nujor bad ki snem bala dep da ka jingshim bynta kham bun jong ki nongrep bad ki nongseng kam lajong bad kane ka pynkylla shibun ïaka jingim jong ki nongrep khamtam ka jingkiew haka ioh ka kot kumba ka sorkar ka don ïaka thong bad lyngba kane ka tamasa bun naki nongrep kin ioh ka jinghikai, ka jingmyntoi bad kumjuh ruh ka kamai kaba kham heh bad ka sorkar Meghalaya ka don shibun ka thong ban kyntiew ïa kiwei kiwei ki mar rep nalor u sohtrun.
U Conrad u la pynpaw ba ka sorkar jylla kan dang bteng ban ai ïa ki lad jingïarap, ban pynkhlaiñ ïa ka jingïaid ïew bad ban pynpaw ïa ki mar rep kiba pawnam jong ka jylla ha ki ïew ba heh, khnang ba Meghalaya kan nang long ka jylla kaba khlaiñ ha ka liang ka rep ka riang bad ka ïoh ka kot.