Ka jingpyrshah ka VPP ïa ka jingwan Behdeiñkhlam u CM ka Assam ka dei ka jingpynkhlemraiñ ïa ka jylla : Sanbor
Shillong, Naitung 10 : U Myntri Sorkar u Bah Sanbor Shullai ha ka sngi Thohdieng, ula pynrem jur ïa ka Voice of the People Party (VPP) namar ka jingpyrshah jongka ïa ka jingwan u Myntri Rangbah ka Assam u Himanta Biswa Sarma sha ka lehniam Behdeinkhlam bad kynthoh ba kane ka jingleh kane ka party ka la pynkhlemraiñ shisha ïa ka jylla Meghalaya
U Himanta ula wan sha kane ka jinglehniam ha Jowai ha ka sngi Palei kum u nongshah khot sngewbha ha ka Seinraij, Jowai ba un long u kongsan.
Kiba la ïadonlang ha kane ka lehniam ki kynthup ïa u Symbud Myntri Rangbah ka Jylla u Ma Sniawbhalang Dhar, u bah Sanbor Shullai, u MLA ka thaiñ bad myntri sorkar u ma Wailadmiki Shylla bad kiwei kiwei.
“Hooid, ngi sngew jah burom bad sngewkhlemraiñ shisha ba ka party Prah (VPP) ka la pyrshah ïa ka jingwan u Myntri Rangbah ka Assam u Himanta Biswa Sarma kum u kongsan ban sakhi ïa kane ka lehniam bad tamasa kaba heh duh jong ka Jaidbynriew Pnar. Nga ruh nga la ïadonlang bad u” ong u Bah Sanbor.
Une u Myntri Sorkar ula ong ba ka jingpynïasnoh ïa kane ka jingwan jong u Himanta sha ka Lehniam bad ki kam ïakajia pud ka dei kaba bakla shibun.
“Nga sngew samrkhie ba ki kynnoh ba u Himanta Biswa Sarma u dei ban pynbeit ïa ka kam kajia pud ne nongpynshong syier ha khappud kane kam don jingïasnoh bad ka jingwan jong u sha ka Lehniam bad ka kam kajia pud” ula ong haba bynrap ba watla ka kynhun ka don ïa ka hok ban pynpaw ïa ka jingsngewkhia halor ka kam khappud, hynrei ban wan ïakhih ha ki jinglehniam na la tynrai ka dei ka bym ïahap satia.
“Mano mano ruh, ki riew shimet, Sengbhalang lane seng saiñ pyrthei ki don ïa ka hok ban kren ïa kano kano ka ishu hynrei kim dei ban pyrshah ïa ka jingwan jong u sha ka lehniam kum u kongsan kam don jingïadei satia bad ka kam khappud” ula ong.
“Halor ka kam khappud, ki la don ki Committee kiba la thaw da ka Sorkar. Lada ki don kano kano ka jingai jingmut lane kano kano ka jingpyrshah, da ka jingthoh, ki dei ban leit sha ka Sorkar lane sha kine ki Committee” ula bynrap.
“Ngi sngew sam rkhie ba ka seng saiñ pyrthei kum ka VPP kala kren ïa kine kiei kiei, ka bym lah satia ban pdiang da ki paidbah jong ka Jylla” ong u bah Shullai.