Kito kiba kyrshan ïa ka Blinkit ki kwah ïa kiba sengkam lajong ka jylla ba kin ïap noh, ong u Bah A Nongkynrih

Shillong, Naitung 09: Ki nongkhaïi kiba dei ki trai ri trai muluk bad ki riew shimet na Nongbah Shillong kiba dei ruh ki nongkhaïi Khasi ki la pynpaw ka jingsngewkhia lada shah ïa ka Blinkit ban treikam na nongbah Shillong.
Uwei na ki dkhot, u Bah Andrew Nongkynrih ha ka snem ba la dep u la ong haba ka Blinkit la shah ba kan treikam ha nongbah na ka bynta ka 3 bnai, ha katei ka por kiba bun kiba leh kam khaïi ki la mad ïa kiba bun ki jingeh.
“Bun na ki dukan ki la ïathuh ba ka la don ka jingduna bha ha ka jingkiew ka jingdie jingthied kaba la long haduh 40 percent shaduh ka 50 percent bad don ruh kumba 30-40 tylli ki dukan ki la hap ban khang khyrdep noh,” ong u Bah Nongkynrih.
U la ïathuh ba dei halor kane ba ki nongkhaïi ka jylla ki la leit ban kynduh ïa ka Executive Committee (EC) jong ka Khasi Hills Autonomous District Council (KHADC) bad kyrpad ïa ki, ba kin peit ïa kane ka kam bad dei halor kane ba ka la lam syndon sha ka jingkhang khyrdep ïa ka Blinkit.
Katkum ka jingong jong u, kane ka Blinkit kaba mynta ym tang ba kan ktah ïa kumba 4000 tylli ki trai dukan hynrei ki don ruh ki nongsam ne ki distributor, kiba dielang (wholesaler), ki nongtrei bad ki head load worker ne ki nongkit, ki nongñiah bad ki ïing ki sem jong ki, kiba la synniang kumba 20 percent na ka jingbun paid ka nongbah Shillong.
U Bah Nongkynrih u la ong ba bun tam na ki dukan kiba siew Goods and Services tax (GST), kiba siew commercial rate sha ka Meghalaya Energy Corporation Limited (MeECL), kiba siew FSSAI Licence, Labour Licence bad ka Weigh and Measure ki mad kane ka jingeh.
“Ngi dei kiba synniang bun bha ka khajna kaba ka jylla ka ïohpdiang bad kumjuh ruh ban pynmih bun ki kam wat na ka bynta ki samla pule kiba kwah ban kamai ha ka por ba ki dang pule,” ula ong.
U la kdew ruh ba ha kum kane ka por ha kaba ka jingkyrduh kam ka jur bha bun ki la sdang la ki jong ki kam khaïi da kaba shim ram bad lada wanrah ïa kane ka company kaba heh kum ka Blinkit ka long kumba pynïap ïa ka kamai kajih ka ïoh ka kot bad bha ka miat jong kiba bun ki paidbah.
U Bah Nongkynrih u la kdew ruh ba ki nongkhaïi jong ka nongbah ki die ïa ki tiar ba la shna da ki nongshong shnong kane ka jylla ha ki dukan jong ki bad khlem da khmih lynti than ban ïohnong hynrei ban pynim ïa ki.
“Ngi kwah ban kyntiew ïa ki tiar ba la shna ha jylla,” u la bynrap.
Katkum ka jingong jong u, kane ka pisa kaba mih na ka jylla kadei hi ban pynlut ha jylla bad kan kyntiew tuh ïa ka ïoh ka kot, hynrei kine ki karkhana nabar ki kjit ka pisa na ka jylla bad ki aikam ruh tang khyndiat ngut.
Ha kajuh ka por u Bah Samran S Syiem u la ïathuh ba bun na kiba sengkam la jong ha Shillong ki kynthup ïa ki grocery ki tiar ki tar kiba kongsan bad da ka jingwan ka Blinkit ym tang ba ki pynïap ïa ka mynsiem ka jingïakhun hynrei ki shimnoh ruh ïa ka kam sengkam bad ka kamai kajih jong kiba bun ki paidbah kiba shaniah ha ki.
“Halor jong ka Blinkit ka treikam hapoh ka business model kaba dei kaba rem. Ki don la ki jong ki nongpynlut ha kaba ki don ka pisa ban pynlut haba ïadei bad ka ïew ka hat, tyrwa ki jingshakri bym donkam siew bad ki jingpynduna dor ïa ki tiar ban khring ïa ki nongthied na ka bynta ka business model jong ki,” ong u Bah Syiem.
U la ong ba ki don ruh ki trai dukan kiba ym lah ban ïakhun bad ka bor jingpynlut jong ka Blinkit.
“Ngim lah ban ai kajuh ka dor ba ka Blinkit ka tyrwa ne ban ai ki jingkhring ban shakri ei,” bynrap u Bah Syiem.
Ha kawei pat ka liang, u la ong ba ki don ki nongleh kam khaïi kiba treikam ha Shillong ki ïarap ïa ki nongsengkam la jong jong ka nongbah ba kin kiew kum ka Oyo, booking.com, Agoda, ha ki hotel industry.
“Kim pynjynjar ïa ki nongsengkam ka jylla hynrei ki ïarap ïa ki ban kiew bad ban ïoh bun ki customer, ki guest bad ban kyntiew ïa ki jingdie jong ki bad ka jingïoh ruh kaba biang hapoh ki kam jong ki,” u la bynrap.
U Bah Syiem u la ong ba ka jingkylli kaba dei ban kylli na kito kiba kyrshan ïa ka Blinkit ka long, la ki kwah ba ki dukan jong kiba na jylla kin jah rngai noh noh ne kumno.
“Tang na ka bynta ka jingmyntoi kaba 10 minit, ka ïohkam ïohjam jong ka pateng jong ngi kan jah bad kan ïap noh,” u la ong.