Lah palat shisnem ai jingthoh ka KHNAM sha KHADC halor ka jingdon ki Rangbah Shnong Garo ha Ri Bhoi

Shillong, Naitung 09: Ka seng Khun Hynñiewtrep National Awakening Movement (KHNAM) ha ka kyrwoh khubor ka la pynpaw ïa ka jingkyrshan kaba pura ïa ka jingdawa jong ka seng HNYM ha kaba ïadei bad ka jingïoh long Rangbah Shnong ki jaitbynriew Garo hapoh ka thaiñ Raid Marwet.
Halor kane na ka liang jong u Working President jong ka seng u Bah Thomas Passah u la ong, “Ka seng ka pynpaw ka jingkyrshan halor ka jingleit kyntu jong ka HNYM ïa ka KHADC ban shimkhia ïa ka jingkam Rangbah Shnong jong ki jaitbynriew Garo hapoh ka thaiñ Raid Marwet, Ri Bhoi District. Ka seng ha kajuh ka nongrim ka la leit ban pyntip sha ka KHADC ha u bnai Iaiong 2025 bad ha kine ki sngi ruh ngi la leit ban ai da ka jingthoh sha u CEM ba mynta u Bah Winston Tony Lyngdoh ban pyntip ba ki don ki jaitbynriew Garo kiba kam rangbah shnong ïalade kum ha ka thaiñ Maikhuli, Pilangkata A, Longkhuli, Mawiong, Gambalbari, Nongspung A Nongspung C bad kiwei kiwei.”
U la ong ba kitei kiba kam rangbah shnong ki la ïadie ïathied jaka, ki soi ïa ki kot jaka bad kumjuh ruh ki ai ïa ki syrnot bad mynta la palat shisnem ba la ai jingthoh sha ka KHADC bad mynta hadien ka jingleit jong ka HNYM la khmih lynti ba ka Council kan shim khia halor kane ka kam bad ba kan leh ïa kaba donkam khlem da pynslem shuh.