Yn ym ai jingkyrshan ka RDA ïano ïano ruh ha kane ka elelkshon MP sha Lok Sabha: President HSPDP

Shillong, Naitung 09: Ka party Hill State People Democratic Party (HSPDP) ha kane ka elekshon MP Lok Sabha shiteng samoi na ka 1-Shillong Parliamentary (ST) Constituency kan nym kyrshan ïano ïano hynrei kum ka party kan shong pdeng kaba la tip ha ka ktien nongwei ban shong ‘Neutral’.
U President ka party HSPDP u Bah K.P. Pangniang ha ka jingïadonlang u Bah Renik Tongkhar MLA na Mawkyrwat, u Bah Metbah Lyngdoh President ka UDP bad kiwei ki dkhot, u la ong ba ka Regional Democratic Alliance (RDA) ka dang don hynrei ha kane ka elekshon MP Lok Sabha shiteng samoi ka party kala rai ban shong pdeng bad ka la ai ïa ka mon laitluid ïa ki dkhot jong ka party ban kyrshan katkum ka jingsngew bit ka jong ki.
Haba jubab ïa ki jingkylli u President u la ong ba kum ka party hadien ka jingïashong pyrkhat la shim ïa ka rai ba kin shong pdeng ha kane ka elekshon MP Lok Sabha shiteng samoi kaba mynta ha ka jingshisha, ka party ka don ka jingthmu ban don la u jong u kyrtong hynrei na ka jingthmit ka por ym lah shuh ban buh kyrtong kumta la shim ïa ka rai ban shong pdeng ha kane ka elekshon MP Lok Sabha.
Ka dei ka jingshisha ba ha ki elekshon ba la dep kum ka party ka la kyrshan ïa u kyrtong ka party UDP ha ka lama jong ka RDA bad kane ka kynhun ka dang don hynrei hadien ka jingïakren hapoh ka party la hap ban shim ïa ka rai ba ha kane ka elekshon MP ba mynta la shim ïa ka rai ban shong pdeng.